दिल्ली उच्च न्यायालयाच्या न्यायाधीशांच्या बंगल्यात सापडली बेहिशेबी रोकड; सर्वोच्च न्यायालयाची तातडीची कारवाई
दिल्ली उच्च न्यायालयाचे न्यायाधीश यशवंत वर्मा यांच्या शासकीय निवासस्थानी १४ मार्च रोजी आग लागल्यानंतर, अग्निशामक दलाने आगीवर नियंत्रण मिळवताना मोठ्या प्रमाणात बेहिशेबी रोकड आढळून आली.
या घटनेनंतर, भारताचे सरन्यायाधीश संजीव खन्ना यांनी सर्वोच्च न्यायालयाच्या कॉलेजियमची तातडीची बैठक बोलावली. या बैठकीत न्यायमूर्ती वर्मा यांची अलाहाबाद उच्च न्यायालयात बदली करण्याचा निर्णय घेण्यात आला, जिथे ते ऑक्टोबर २०२१ पर्यंत कार्यरत होते.
न्यायमूर्ती वर्मा यांचा जन्म ६ जानेवारी १९६९ रोजी अलाहाबाद येथे झाला. दिल्ली विद्यापीठाच्या हंसराज महाविद्यालयातून त्यांनी बी.कॉमची पदवी मिळविली आणि नंतर मध्य प्रदेशच्या रेवा विद्यापीठातून एलएलबी पूर्ण केले. ८ ऑगस्ट १९९२ रोजी त्यांनी वकिली सुरू केली. १३ ऑक्टोबर २०१४ रोजी त्यांनी अलाहाबाद उच्च न्यायालयात अतिरिक्त न्यायाधीश म्हणून काम करण्यास सुरुवात केली आणि १ फेब्रुवारी २०१६ रोजी त्यांची कायमची नियुक्ती झाली. ११ ऑक्टोबर २०२१ रोजी त्यांची दिल्ली उच्च न्यायालयात बदली झाली होती.
सर्वोच्च न्यायालयाने या प्रकरणाची गंभीर दखल घेतली असून, न्यायमूर्ती वर्मा यांच्या विरोधात चौकशी समिती गठीत केली आहे. जर त्यांनी स्वेच्छेने राजीनामा दिला नाही, तर संसदेत महाभियोगाची प्रक्रिया सुरू होऊ शकते.
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
