दीनानाथ मंगेशकर रुग्णालयाची असंवेदनशीलता; गर्भवतीवर उपचार नाकारल्याप्रकरणी मुख्यमंत्री फडणवीस यांचे तीव्र शब्दांत निर्देश
राज्यातील धर्मादाय रुग्णालयांवर सरकारकडून वाढते नियंत्रण; उच्चस्तरीय चौकशी समिती स्थापन
पुणे, ६ एप्रिल २०२५ –
तनिषा भिसे या गर्भवती महिलेला अनामत रकमेअभावी दाखल करून न घेतल्याने दीनानाथ मंगेशकर रुग्णालयाने दाखवलेली असंवेदनशीलता अत्यंत निंदनीय आहे, अशी तीव्र प्रतिक्रिया मुख्यमंत्री देवेंद्र फडणवीस यांनी व्यक्त केली आहे. या प्रकरणाची गंभीर दखल घेत त्यांनी उच्चस्तरीय चौकशीचे आदेश दिले असून धर्मादाय सहआयुक्तांच्या अध्यक्षतेखाली चौकशी समितीची स्थापना करण्यात आली आहे.
पैशाच्या अभावामुळे रुग्णाला उपचार न मिळणे ही गंभीर सामाजिक समस्या असल्याचे मुख्यमंत्र्यांनी नमूद केले. तनिषा भिसे यांना रुग्णालयात दाखल करून घेण्यासाठी मुख्यमंत्री वैद्यकीय कक्षाकडूनही प्रयत्न झाले, मात्र रुग्णालय प्रशासनाने कोणताही सकारात्मक प्रतिसाद दिला नाही. त्यामुळे या गर्भवतीचा दुर्दैवी मृत्यू झाला.
या घटनेनंतर सरकारने फौजदारी स्वरूपात लक्ष घातले असून, संबंधित रुग्णालयाच्या भूमिकेची सखोल चौकशी करण्यात येणार आहे. “दोषींवर कठोर कारवाई केली जाईल,” असे सांगताना फडणवीस यांनी स्पष्ट केले की, “राज्यातील सर्व धर्मादाय रुग्णालये त्यांची सामाजिक जबाबदारी पार पाडतात का, याचा सुद्धा तपास करण्यात येईल.”
मुख्यमंत्र्यांच्या मते, या घटनेमुळे धर्मादाय रुग्णालयांवरील विश्वास डळमळीत होण्याची शक्यता असून, त्यामुळेच भविष्यात असे प्रकार पुन्हा घडू नयेत म्हणून शासन अधिक काटेकोर नियंत्रण आणणार आहे.
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
