“मोदी 200 देश फिरले, पण हिंदुस्थानला मित्र नाही!” — संजय राऊत यांचा मोदींवर घणाघात
शिवसेना (उद्धव बाळासाहेब ठाकरे) नेते संजय राऊत यांनी केंद्र सरकारवर टीका करत इंदिरा गांधींची आठवण करून दिली; ‘ऑपरेशन सिंदूर’ पूर्ण होईपर्यंत लढा थांबणार नाही, असेही स्पष्ट मत
बातमी …..
“पंतप्रधान नरेंद्र मोदी यांनी 200 देशांचे दौरे केले, पण हिंदुस्थानला ठाम पाठिंबा देणारा मित्रदेश कुठे आहे?” असा संतप्त सवाल उपस्थित करत शिवसेना (उद्धव बाळासाहेब ठाकरे) पक्षाचे नेते व खासदार संजय राऊत यांनी रविवारी केंद्र सरकारवर जोरदार टीका केली.
राऊत म्हणाले की, “मोदी मिठ्या मारत जगभर फिरले, पण आजच्या युद्धाच्या पार्श्वभूमीवर कोणता देश हिंदुस्थानच्या बाजूने उभा आहे, हे त्यांनी दाखवावे. चीन आणि तुर्की उघडपणे पाकिस्तानच्या बाजूने आहेत, मग आमचा मित्र कोण?”
डोनाल्ड ट्रम्प यांच्या मध्यस्थीबाबत बोलताना त्यांनी प्रश्न केला की, “ट्रम्प कोण आहेत? केंद्र सरकार त्यांची मध्यस्थी का मान्य करतंय? त्यांनी जर खरोखरच जगात शांतता प्रस्थापित केली असती तर गाझा युद्ध थांबले नसते. पाकिस्तानच्या हल्ल्यात 20 भारतीय नागरिक ठार झाले, 26 महिलांचे कुंकू पुसले गेले, पण कारवाई कुठे आहे?”
राऊत म्हणाले की, “आज इंदिरा गांधी असत्या तर पाकिस्तान नामशेष झाला असता. त्यांनी 1971 साली अमेरिकेचा दबाव झुगारून पाकिस्तानचे दोन तुकडे केले होते. मोदी सरकार मात्र ट्रम्पसारख्या नेत्यांकडे मदतीची भीक मागते. इंदिराजींनी सांगितलं होतं की आम्ही स्वतंत्र राष्ट्र आहोत, हस्तक्षेप करू नका.”
“मोदी व शहा यांना पदावर राहण्याचा अधिकार नाही,” असे सांगत त्यांनी भाजपनेच मोदींचा राजीनामा मागावा अशी मागणी केली. “26 महिलांचे कुंकू पुसणारे दहशतवादी अजूनही मोकाट आहेत. ऑपरेशन सिंदूर पूर्ण होईपर्यंत शांत बसायचं नाही,” असेही ते म्हणाले.
“नेहरू, शास्त्री, इंदिरा गांधी, राजीव गांधी यांच्यावर टीका करणाऱ्यांना त्यांच्या पायाचे तीर्थ पिण्याचीही लायकी नाही,” असेही राऊत यांनी ठामपणे सांगितले.
हॅशटॅग्स:
#SanjayRaut #NarendraModi #IndiraGandhi #PakistanAttack #OperationSindoor #ShivSena #ModiResignDemand #IndiaForeignPolicy #DonaldTrump #JammuKashmir
फोटो
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
