“दिवाळीत फटाके नाही… किल्ले बांधू या! — ‘संजीवनी’ची ऐतिहासिक किल्ला स्पर्धा”
मुंबई (गुरुदत्त वाकदेकर) : संजीवनी सेवाभावी सामाजिक संस्था, मुंबई यांनी यंदा दिवाळीच्या पार्श्वभूमीवर “किल्ला बांधणी स्पर्धा – २०२५” चे भव्य आयोजन केले आहे. “फेकला तर दगड, रचला तर किल्ला… चला तर मग किल्ला बनवूया, मातीशी नाते जोडूया!” या प्रेरणादायी घोषवाक्याने स्पर्धेला सुरुवात झाली आहे. या उपक्रमाचा हेतू छत्रपती शिवाजी महाराजांच्या गड-किल्ल्यांचे वैभव तरुणांच्या हातून पुन्हा साकार करणे हा आहे. या स्पर्धेत सहभाग पूर्णपणे मोफत असून वयोमर्यादा किंवा स्थळाची कोणतीही अट नाही.
स्पर्धा १२ ऑक्टोबर ते २६ ऑक्टोबर २०२५ या कालावधीत होईल. स्पर्धकांनी मातीचा वापर करून पर्यावरणपूरक पद्धतीने किल्ला तयार करायचा आहे. प्रत्येक किल्ल्याला स्वतंत्र नाव देणे बंधनकारक आहे. तयार किल्ल्यांचे तीन फोटो आणि १ मिनिटाचा व्हिडिओ, स्वतःचे नाव व पत्त्यासह, संस्थेच्या @Sanjeevani.ngo2021 या इंस्टा पेजवर किंवा ९०२२११३२९४ या क्रमांकावर पाठवायचे आहेत. गटकार्य, कल्पकता, किल्ल्याची माहिती आणि सादरीकरणाची सुबकता या निकषांवर परीक्षक मंडळ विजेते ठरवणार आहे.
स्पर्धेसाठी आकर्षक पारितोषिक ठरवण्यात आली आहेत. प्रथम पारितोषिक: १,१११/- रुपये व सन्मानचिन्ह; द्वितीय पारितोषिक: ₹७५१/- सह सन्मानचिन्ह; तृतीय पारितोषिक: ₹५५१/- सह सन्मानचिन्ह. याशिवाय उत्तेजनार्थ स्पर्धकांनाही सन्मानचिन्ह दिले जाईल. विजेत्या किल्ल्यांचे फोटो आणि व्हिडिओ संस्थेच्या इंस्टा पेजवर प्रकाशित केले जातील. त्यामुळे तरुणाईच्या कल्पकतेला एक सर्जनशील व्यासपीठ मिळेल.
या उपक्रमासाठी गणेश निकम (अध्यक्ष), आनंदराव जाधव (सचिव), मोहन दाबेकर (खजिनदार) यांच्यासह अॅड. रविकांत शुक्ला यांच्या मार्गदर्शनाखाली कार्यसंघ सक्रिय आहे. “इतिहास जपू या, परंपरा जगवू या — यंदाची दिवाळी किल्ल्यांच्या प्रकाशात उजळू या,” असे आवाहन करत संस्था सर्व नागरिकांना सहभागी होण्यासाठी प्रोत्साहित करते. फटाक्यांच्या आवाजात इतिहास हरवू नये म्हणून या दिवाळीत किल्ले बांधूया, मातीशी नाते जोडूया!
Author: RV. Reporters
Guhagar Office .. * Ratnagiri vartahar Digital News * ..
