🛑 इलेक्ट्रॉनिक्स, सौंदर्य उत्पादने आणि वाहने महागणार; रुपयाच्या घसरणीचा थेट फटका

दिल्ली ~डॉलरच्या तुलनेत भारतीय रुपयाची सातत्याने होत असलेली घसरण आता सर्वसामान्य ग्राहकांच्या खिशाला मोठा तडाखा देणार आहे. आयात-आधारित वस्तूंवरील खर्च वाढल्यामुळे मोबाईल, लॅपटॉप, टीव्ही, एसी, फ्रीजपासून ते महागडी सौंदर्य उत्पादने आणि वाहनांपर्यंत सर्वच वस्तूंच्या किमतीत वाढ होण्याची शक्यता आहे.

▪️आयात कंपन्यांवर वाढत्या खर्चाचा तडाखा

बहुतांश इलेक्ट्रॉनिक वस्तू किंवा त्यांचे आवश्यक सुटे भाग विदेशातून आयात केले जातात. डॉलर मजबुत आणि रुपया कमजोर झाल्याने आयातदारांना त्याच वस्तूसाठी आता अधिक पैसे मोजावे लागत आहेत. वाढत्या कच्च्या मालाच्या किंमतींच्या पार्श्वभूमीवर कंपन्यांना हा अतिरिक्त खर्च ग्राहकांवर टाकण्याशिवाय पर्याय उरलेला नाही.

▪️डिसेंबर–जानेवारीपासून दरवाढ निश्चित

मोबाईल फोन, लॅपटॉप, टीव्ही आणि घरगुती उपकरणे उत्पादक कंपन्यांनी डिसेंबर २०२५ ते जानेवारी २०२६ या दरम्यान ३% ते ७% दरवाढीचे संकेत दिले आहेत.

मेमरी चिप्स, तांबे आणि इतर सुट्या भागांच्या किंमतींमध्ये लक्षणीय वाढ झाल्याने उत्पादन खर्च मोठ्या प्रमाणात वाढत आहे. काही उत्पादनांमध्ये आयातीचा हिस्सा ३० ते ७०% असल्याने रुपयाची कमजोरी अत्यंत महागात पडत आहे.

▪️जीएसटी कपातीचा फायदा संपला

उद्योग क्षेत्रातील प्रमुख अधिकारी अवनीत सिंग मारवाह यांनी सांगितले की,

> “जीएसटी कपातीचा जो लाभ ग्राहकांना मिळत होता, तो आता संपुष्टात येईल. कारण सुट्या भागांच्या किंमती आणि रुपयाची घसरण यामुळे कंपन्यांचा खर्च प्रचंड वाढला आहे.”

त्यांनी पुढे सांगितले की, केवळ मेमरी चिप्सचे दर चार महिन्यांत सहा पटीने वाढले आहेत.

▪️कंपन्यांच्या योजना कोलमडल्या

अनेक कंपन्यांनी रुपया ₹८५–८६ प्रति डॉलर या अंदाजावर आपले आर्थिक नियोजन केले होते. मात्र रुपया आता ₹९० च्या पुढे गेल्याने संपूर्ण बाजारपेठेचे गणित बदलत आहे.

कंपन्यांची दरवाढ – अंदाजित आकडे

हॅवेल्स एलईडी टीव्ही – सुमारे ३% वाढ

सुपर प्लास्ट्रोनिक्स – विविध उत्पादनांवर ७% ते १०% वाढ

गोदरेज ॲप्लायन्सेस (एसी, फ्रीज) – ५% ते ७% वाढ

▪️सौंदर्य उत्पादनेही महाग

शिसेडो, एमएसी, बॉबी ब्राऊन, क्लीनिक, द बॉडी शॉप यांसारख्या प्रसिद्ध आंतरराष्ट्रीय ब्रँड्सची उत्पादने आयातीवर अवलंबून असल्याने ती अधिक महागणार आहेत.

रुपयाच्या घसरणीचा थेट परिणाम त्यांच्या भारतातील विक्री किंमतींवर होईल.

▪️वाहन क्षेत्रालाही फटका

ऑक्टोबर–नोव्हेंबर महिन्यात जीएसटी घटीनंतर दुचाकी आणि छोट्या कारांच्या विक्रीत चांगली वाढ झाली होती. परंतु आता रुपया कमकुवत झाल्याने एंजिन पार्ट्स, इलेक्ट्रॉनिक मॉड्यूल्स आणि इतर आयातित घटक महागले असून, वाहन कंपन्याही किंमतवाढीचा विचार करत आहेत.

यामुळे सध्या वाढलेली विक्रीगती थांबण्याची भीती व्यक्त केली जात आहे.

रुपयाची सततची घसरण, वाढलेले कच्च्या मालाचे दर आणि आयातीवरील अवलंबित्व—या तिहेरी फटक्यामुळे येत्या काही महिन्यांत ग्राहकांना अनेक आवश्यक वस्तूंसाठी अधिक खर्च करावा लागणार आहे.

.

Author: RV.Ratnagiri Office

रत्नागिरी वार्ताहर डिजिटल बातमी पत्र - एडिटर विभाग