गुहागर: भंडारी भवनसमोरील पेव्हिंग ब्लॉक प्रकरणात खोटी तक्रार उघड.
गुहागर (सुजित सुर्वे प्रतिनिधी) – गुहागर शहरातील भंडारी भवनसमोरील मैदानावर नगरोत्थान निधीतून पेव्हिंग ब्लॉक बसवण्याच्या कामावरून मोठा वाद निर्माण झाला आहे. या प्रकरणात गैरव्यवहाराचा आरोप करत आमदार भास्कर जाधव यांनी चौकशीची मागणी केली आहे. मात्र, या वादात नवा ट्विस्ट आला असून, या प्रकरणात दाखल करण्यात आलेली तक्रारच बनावट असल्याचे समोर आले आहे.
गुहागर नगरपंचायतीने भंडारी समाज संस्थेकडून संमती घेतल्यानंतर मैदानावर पेव्हिंग ब्लॉक बसवले होते. मात्र, या कामावर आक्षेप घेत कल्पेश गुरव यांच्या नावाने जिल्हाधिकाऱ्यांना पत्र पाठवले गेले. या पत्रात, सदर जागा सार्वजनिक असून, भंडारी समाजाने अनधिकृतपणे ताबा घेतल्याचा आरोप होता. तसेच, गेट आणि कंपाउंड उभारून नागरिकांना प्रवेश नाकारला जात असल्याने ही जागा खुली करण्याची मागणी करण्यात आली होती.
या तक्रारीच्या आधारे आमदार भास्कर जाधव यांनी ३ मार्च २०२५ रोजी नगरविकास सचिव, कोकण विभागीय आयुक्त आणि जिल्हाधिकाऱ्यांना पत्र पाठवत या कामाची सखोल चौकशी करून संबंधितांवर कठोर कारवाई करण्याची मागणी केली. तसेच, सरकारी निधीचा गैरवापर झाल्यास तो जबाबदारांकडून वसूल करावा, असेही नमूद करण्यात आले.
मात्र, या प्रकरणाला नवे वळण मिळाले आहे. भंडारी समाज संस्थेच्या पदाधिकाऱ्यांनी तक्रारदार कल्पेश गुरव यांचा शोध घेतला असता, ते गुहागरजवळील असगोली येथे आढळले. त्यांच्याशी संवाद साधल्यानंतर त्यांनी अशी कोणतीही तक्रार दाखल केलेली नसल्याचे स्पष्ट केले. एवढेच नव्हे, तर अर्जावरील सही आणि पत्ताही आपला नसल्याचे त्यांनी सांगितले.
यानंतर, कल्पेश गुरव यांनी नगरपंचायतीच्या मुख्याधिकाऱ्यांकडे अधिकृत पत्र आणि प्रतिज्ञापत्र सादर करून आपली तक्रार बनावट असल्याचे स्पष्ट केले. त्यांच्या नावाचा गैरवापर करून अज्ञात व्यक्तीने ही तक्रार केली असल्याचा आरोप त्यांनी केला आहे.
या घटनेमुळे गुहागर नगरपंचायत आणि भंडारी समाज संस्थेत खळबळ उडाली आहे. आता प्रश्न असा आहे की, ही बनावट तक्रार कोणी आणि का केली? तसेच, यामागे कोणते राजकीय किंवा अन्य हितसंबंध आहेत का? या सर्व प्रश्नांची उत्तरे चौकशीनंतरच मिळतील. दरम्यान, आमदार भास्कर जाधव यांच्या पत्रानंतर या प्रकरणाची उच्चस्तरीय चौकशी होण्याची शक्यता आहे.
Author: Team Ratnagiri Vartahar
Official Ratnagiri vartahar Media creators & RV News YouTube Channel.
