गुहागर तालुका काँग्रेस अध्यक्ष मिलिंद चाचे यांचा राजीनामा
कौटुंबिक व वैयक्तिक कारणास्तव पद सोडण्याचा निर्णय; हर्षवर्धन सपकाळ यांना राजीनाम्याची विनंती
सविस्तर बातमी:
गुहागर ( सुजित सुर्वे ).तालुका काँग्रेस कमिटीचे अध्यक्ष मिलिंद आत्माराम चाचे यांनी आपल्या पदाचा राजीनामा दिला आहे. प्रदेश अध्यक्ष हर्षवर्धनजी सपकाळ यांना पाठवलेल्या पत्राद्वारे त्यांनी हा निर्णय जाहीर केला.
राजीनाम्याचे कारण देताना मिलिंद चाचे यांनी सांगितले की, काही कौटुंबिक व वैयक्तिक अडचणींमुळे त्यांना या पदाला योग्य प्रकारे न्याय देता येत नाही. तसेच, त्यांचे वास्तव ठिकाण कळवा, ठाणे येथे असल्याने ते पक्षाच्या तालुकास्तरीय कामकाजात अपेक्षित वेळ देऊ शकत नाहीत. त्यामुळे त्यांनी गुहागर तालुका काँग्रेस अध्यक्षपदाचा राजीनामा देण्याचा निर्णय घेतला आहे.
“मी गुहागर तालुका काँग्रेसचा अध्यक्ष असून कौटुंबिक व काही वैयक्तिक अडचणींमुळे मला या पदाला न्याय देता येत नाही व कामही करता येत नाही. माझे राहण्याचे ठिकाण कळवा, ठाणे येथे असल्याने मी पाहिजे तेवढा वेळ देऊ शकत नाही. त्यामुळे मी गुहागर तालुका काँग्रेस अध्यक्षपदाचा राजीनामा देत आहे. कृपया आपण माझा राजीनामा स्वीकारावा,” अशी विनंती त्यांनी आपल्या पत्रात केली आहे.
गुहागर तालुक्यात काँग्रेस पक्षाची संघटना बळकट करण्यासाठी कार्यरत असलेल्या मिलिंद चाचे यांच्या या निर्णयामुळे स्थानिक पातळीवर नव्या नेतृत्वाची निवड ही पक्षासाठी महत्त्वाची ठरणार आहे. आता त्यांच्या जागी कोणाची नियुक्ती केली जाते, याकडे पक्षातील कार्यकर्ते आणि स्थानिक राजकीय वर्तुळाचे लक्ष लागून राहिले आहे.
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
