क्रिप्टो करन्सीचा मोह महागात! नाशिकमध्ये ३८ गुंतवणूकदारांना ८१ लाखांचा गंडा
दरमहा पाच हजार लाभांश, सहलीचे आमिष अन् ‘ओरीस कॉईन’ योजनेचा फसवा जाळ! सात जणांविरोधात गुन्हा दाखल
नाशिक | प्रतिनिधी
‘फक्त १ लाख ४० हजार गुंतवा आणि दरमहा ५ हजार मिळवा’ या आमिषाला भुलून नाशिकमधील तब्बल ३८ गुंतवणूकदारांनी ओरीस क्रिप्टो करन्सीत ८१ लाख रुपयांची गुंतवणूक केली, मात्र काही दिवसांतच या योजनेचा फसवा चेहरा उघड झाला. दरमहा परतावा, सहलीसह इतर लाभ देण्याचे सांगून संशयितांनी पैसे उकळले. याप्रकरणी सात जणांविरोधात सायबर पोलीस ठाण्यात गुन्हा दाखल करण्यात आला आहे.
पवननगर सिडको येथील श्वेता सुरते यांनी दिलेल्या तक्रारीवरून प्रसाद तडाखे, पवन उबाळे, समर्थ जगताप (रा. नाशिक), खुशाल पवार, तसेच ओरीस कॉईन क्रिप्टो करन्सीचे देशातील संचालक राहुल खुराणा, अविनाश सिंग, रहव ठाकूर या सात जणांची नावे समोर आली आहेत.
संशयितांनी ‘ओरीस कॉईन’ या क्रिप्टो करन्सीत गुंतवणुकीचे आमिष दाखवून फसवणूक केली. गुंतवणुकीवर दरमहा पाच हजारांचा परतावा, नवीन गुंतवणूकदार जोडल्यास दलाली, तसेच ‘कॅम्पमॅक्स’ येथे सहलीची व्यवस्था अशा अनेक गोष्टी सांगून त्यांनी गुंतवणूकदारांचा विश्वास संपादन केला. काहींना सुरुवातीला लाभांश दिला, मात्र नंतर तो बंद झाला.
श्वेता सुरते आणि त्यांचे भाऊ अजिंक्य सुरते यांनी अनुक्रमे १.४० लाख आणि १.१४ लाख, तर त्यांच्या ३६ ओळखीच्या गुंतवणूकदारांनी ७८.८८ लाख रुपये गुंतवले. सायबर पोलिसांनी या तक्रारीनंतर सात जणांविरोधात गुन्हा दाखल केला असून, फसवणूक झालेल्यांची संख्या आणखी वाढण्याची शक्यता वरिष्ठ पोलीस निरीक्षक सुभाष ढवळे यांनी व्यक्त केली आहे.
भ्रामक योजनांचे सापळे कायम!
क्रिप्टो, शेअर मार्केट, इमू पालन, केबीसी, मैत्रेय अशा विविध नावांखाली गेल्या दशकभरात गुंतवणूकदारांची कोट्यवधी रुपयांची फसवणूक झाली आहे. तरीही नवनवीन स्वरूपातील भ्रामक योजनांना लोक बळी पडत आहेत.
#CryptoFraud #NashikNews #InvestmentScam #OrysCoin #CrimeAlert #MLMFraud #सायबरफसवणूक #RatnagiriVartahar
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
