“समाज एकता मनसे चषक २०२५” ला उत्साहात सुरुवात – ब्लू पँथरचा उद्घाटन सामन्यात विजय
प्रमोद गांधी यांच्या संकल्पनेतून १२ समाजांचे एकत्रित प्रतिनिधीत्व; ब्लू पँथरने विराट विश्वकर्मा संघावर मात करत स्पर्धेची दमदार सुरुवात
आबलोली (संदेश कदम) – महाराष्ट्र नवनिर्माण सेनेचे गुहागर तालुका संपर्क अध्यक्ष प्रमोद गांधी यांच्या संकल्पनेतून आणि पुढाकारातून “एक समाज एक संघ, समाज एकता मनसे चषक २०२५” या बहुप्रतिक्षित मर्यादित षटकांची क्रिकेट स्पर्धा गुहागर विधानसभा क्षेत्रात उत्साहात सुरु झाली. शृंगारतळी जानवळे फाटा येथील गोल्डन पार्क मैदानावर रंगतदार वातावरणात या स्पर्धेचा शुभारंभ करण्यात आला.
छत्रपती शिवाजी महाराज व डॉ. बाबासाहेब आंबेडकर यांच्या प्रतिमांचे पूजन, दीपप्रज्वलन व पुष्पहार अर्पण करून या स्पर्धेचे औपचारिक उद्घाटन करण्यात आले. यावेळी प्रमोद गांधी, मनसे उपजिल्हाध्यक्ष विनोद जानवळकर, तालुकाध्यक्ष सुनील हळदणकर, डॉ. राजेंद्र पवार आणि सर्व समाजांचे अध्यक्ष उपस्थित होते.
उद्घाटन समारंभासाठी पाटपन्हाळे ग्रामपंचायत उपसरपंच असीम साल्हे, डॉ. राजेंद्र पवार, मामा शिर्के, ओंकार संसारे, गौरव वेल्हाळ, पिंट्या संसारे, महेंद्र मोहिते, संतोष धामणस्कर, मारुती मोहिते, सुरेश जाधव, भीमसेन सावंत, मुकेश असगोलकर, सुमित नांदलस्कर, कैलास पिळणकर, सुदेश सकपाळ, समीर जोयशी, सुरेंद्र निकम, अंतिम संसारे, जितेंद्र साळवी आणि अमित खांडेकर यांची प्रमुख उपस्थिती होती.
या स्पर्धेमध्ये खारवी (सागरी योद्धा), भंडारी (टायगर योद्धा), सुतार (विराट विश्वकर्मा), गुरव (जीपीएल यंग स्टार), मुस्लिम (आझाद रॉयल फायटर्स), वैश्य वाणी (कोकण कट्टा), नंदीवाले (श्री तिरुपती बालाजी), तेली (जय संताजी), बौद्ध (ब्लू पँथर), बेलदार (ओम साई इलेव्हन), कुणबी (भूमिपुत्र फायटर्स) आणि मराठा (स्वराज्य रक्षक) समाजांचे एकूण १२ संघ सहभागी झाले आहेत.
उद्घाटन सामन्यात बौद्ध समाजाचा ब्लू पँथर आणि सुतार समाजाचा विराट विश्वकर्मा संघ आमने-सामने आले. उत्कंठावर्धक लढतीत ब्लू पँथर संघाने विजय मिळवत स्पर्धेची पहिली माळ गाठली.
या वेळी प्रमोद गांधी यांनी मनोगत व्यक्त करताना, “गुहागर तालुक्यातील खेळाडूंनी राज्य व देशपातळीवर आपली छाप सोडावी, यासाठी या स्पर्धेच्या माध्यमातून संधी निर्माण केली आहे. माझ्याकडून शक्य ते सर्व सहकार्य खेळाडूंना दिले जाईल,” असे सांगितले.
प्रत्येक सहभागी खेळाडूचा मनसेच्या वतीने भेटवस्तूंनी सत्कार करण्यात आला. स्पर्धेचे सूत्रसंचालन शाहिर शाहिद खेरटकर यांनी केले तर समालोचनाची जबाबदारी सिद्धेश ऊतेकर, सिद्दिक मेमन आणि असीम साल्हे यांनी लीलया सांभाळली.
हॅशटॅग्स:
#मनसेचषक2025 #समाजएकता #गुहागरस्पर्धा #ब्लूपँथरविजयी #प्रमोदगांधी #गुहागरमनसे #CricketWithUnity #RatnagiriNews
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
