डी.बी.जे. महाविद्यालयात डॉ. बाबासाहेब आंबेडकर जयंती उत्साहात साजरी
१८ तास सलग अभ्यास अभियानाचे आयोजन; विद्यार्थ्यांना प्रमाणपत्र देऊन गौरव
चिपळूण (प्रतिनिधी):
नवकोकण एज्युकेशन सोसायटीच्या डी.बी.जे. महाविद्यालयात भारतरत्न, संविधान निर्माते डॉ. बाबासाहेब आंबेडकर यांची १३४ वी जयंती मोठ्या उत्साहात आणि प्रेरणादायी वातावरणात साजरी करण्यात आली. या जयंतीनिमित्त आयोजित १८ तासांच्या सलग अभ्यास अभियानात सहभागी झालेल्या विद्यार्थ्यांचा विशेष गौरव करण्यात आला.
कार्यक्रमाची सुरुवात डॉ. बाबासाहेब आंबेडकर आणि छत्रपती शिवाजी महाराज यांच्या प्रतिमांना पुष्पहार अर्पण करून करण्यात आली. या वेळी प्रमुख मार्गदर्शक म्हणून महाविद्यालयाचे ग्रंथपाल डॉ. सुधीर मोरे यांनी ‘डॉ. बाबासाहेब आंबेडकरांचे शिक्षण विषयक दृष्टीकोन’ या विषयावर विचारमंथन केले.
डॉ. मोरे यांनी बाबासाहेबांच्या विद्यार्थी जीवनापासून ते उच्च शिक्षणापर्यंतचा प्रवास उलगडून दाखवला. “फक्त ज्ञानी असून चालत नाही, तर विद्यार्थ्यांनी शील आणि करुणा देखील अंगी बाळगली पाहिजे,” असे सांगत त्यांनी बाबासाहेबांनी सांगितलेली शिक्षक आणि विद्यार्थ्यांची भूमिका उपस्थितांसमोर स्पष्ट केली. “प्राध्यापकांनी आपला सारा वेळ अध्ययन, अध्यापन आणि संशोधनासाठी खर्च करावा” असा बाबासाहेबांचा दृष्टिकोन त्यांनी अधोरेखित केला.
कार्यक्रमाच्या अध्यक्षस्थानी महाविद्यालयाचे प्राचार्य डॉ. माधव बापट होते. विचारमंचावर उप-प्राचार्य डॉ. राजेंद्र मोरे, डॉ. चेतन आठवले, कनिष्ठ महाविद्यालयाचे उप-प्राचार्य प्रा. एन.एस. तळप आणि कार्यालय प्रमुख श्री. अनिल कलकुटकी उपस्थित होते. कार्यक्रमाचे सूत्रसंचालन प्रा. सुनील भादुले यांनी केले.
या कार्यक्रमाला महाविद्यालयातील सर्व शिक्षक, शिक्षकेत्तर कर्मचारी, तसेच सलग अभ्यास अभियानात सहभागी विद्यार्थी मोठ्या संख्येने उपस्थित होते. कार्यक्रमाने डॉ. बाबासाहेबांच्या विचारांची उजळणी होऊन विद्यार्थ्यांना नवचेतना मिळाली.
हॅशटॅग्स:
#DBJCollege #Chiplun #AmbedkarJayanti2025 #DrAmbedkar #EducationalInspiration #18HoursStudy #CollegeEvents #RatnagiriNews #MarathiNews
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
