ब्रेकिंग: राष्ट्रवादी शरदचंद्र पवार पक्षाच्या महाराष्ट्र प्रदेशाध्यक्षपदी शशिकांत शिंदे यांची नियुक्ती!
शरद पवारांनी फिरवली भाकरी: शशिकांत शिंदेंकडे प्रदेशाध्यक्षपदाची सूत्रे
मुंबई: गेल्या सात वर्षांपासून राष्ट्रवादी काँग्रेस शरदचंद्र पवार पक्षाचे प्रदेशाध्यक्षपद सांभाळणारे जयंत पाटील यांनी अखेर राजीनामा दिला आहे. त्यांच्या जागी आता साताऱ्याचे आमदार शशिकांत शिंदे यांची नवे प्रदेशाध्यक्ष म्हणून अधिकृतपणे घोषणा करण्यात आली आहे. पक्षाच्या सर्वसाधारण बैठकीत जयंत पाटील यांनी निरोपाचे भाषण केले, त्यानंतर शशिकांत शिंदे यांच्या नावावर शिक्कामोर्तब करण्यात आले. येऊ घातलेल्या स्थानिक स्वराज्य संस्थांच्या निवडणुकांमध्ये पक्षाचे जास्तीत जास्त उमेदवार निवडून आणण्याचे मोठे आव्हान शशिकांत शिंदे यांच्यासमोर असणार आहे.
जयंत पाटील यांच्या नेतृत्वाची यशस्वी कामगिरी आणि राजीनाम्याची पार्श्वभूमी
लोकसभा निवडणुकीदरम्यान पक्षांतर्गत फेरबदलांची मागणी जोर धरू लागली होती, परंतु शरद पवार यांनी लोकसभा निवडणुका जयंत पाटील यांच्या अध्यक्षतेखालीच लढवल्या जातील असे स्पष्ट केले होते. त्यांच्या नेतृत्वाखालील पाच वर्षांचे मजबूत संघटन, अचूक उमेदवारांची निवड आणि सरकारविरोधी जनमताचा फायदा घेत, राष्ट्रवादीला लोकसभा निवडणुकीत १० पैकी तब्बल ८ खासदार निवडून आणण्यात यश आले.
विधानसभा निवडणुकीतही हीच रणनीती कायम ठेवत जयंत पाटील यांनी राज्यभर दौरे केले. मात्र, यावेळी महायुतीने महाविकास आघाडीला जोरदार धक्का दिल्याने जयंत पाटील यांना पक्षाची सदस्यसंख्या वीसच्या वर नेण्यात अपयश आले. तेव्हापासून त्यांच्या राजीनाम्याची मागणी जोर धरू लागली होती. जुलै २०१८ ते जुलै २०२५ असे सात वर्षांचा दीर्घकाळ जयंत पाटील यांनी राष्ट्रवादीचे प्रदेशाध्यक्षपद भूषवले.
शशिकांत शिंदे: आक्रमक नेते आणि पुढील आव्हाने
शशिकांत शिंदे हे पश्चिम महाराष्ट्रातील एक महत्त्वाचे नेते असून, माथाडी कामगार संघटनांमध्ये त्यांचे मोठे वजन आहे. त्यामुळे नवी मुंबईच्या राजकारणातही त्यांचा सक्रिय सहभाग असतो. त्यांनी कोरेगाव विधानसभेचे दोन वेळा प्रतिनिधित्व केले आहे. शशिकांत शिंदे यांच्या रुपाने राष्ट्रवादीला पुन्हा एकदा मराठा प्रदेशाध्यक्ष मिळाले आहेत. लढवय्ये, झुंजार आणि आक्रमक शैलीत विरोधकांवर तुटून पडणारे अशी त्यांची ओळख आहे. त्यांचे शरद पवार यांच्याशी अतिशय निकटचे संबंध आहेत.
प्रदेशाध्यक्ष म्हणून त्यांच्यासमोरील पहिली आणि मोठी चाचणी स्थानिक स्वराज्य संस्थांच्या निवडणुका असतील. राष्ट्रवादीत फूट पडल्यानंतर पक्ष संघटना दुभंगली आहे आणि स्थानिक पातळीवर पक्षाचे म्हणावे असे मजबूत संघटन नाही. त्यामुळे पुढील तीन ते चार महिन्यांत गावोगावी जाऊन पक्षाचा विचार लोकांपर्यंत पोहोचवणे हे पहिले काम शशिकांत शिंदे यांना करावे लागणार आहे. तसेच, राज्यात विभागवार आढावा घेऊन स्थानिक स्वराज्य संस्थांची राजकीय गणिते जुळवणे हे देखील त्यांच्यासमोरील एक महत्त्वाचे आव्हान असेल.
Hashtags:
#शशिकांतशिंदे, #राष्ट्रवादी, #शरदपवार #जयंतपाटील, #राजकारण #महाराष्ट्र #NCP
* #MaharashtraPolitics
* #ShashikantShinde #JayantPatil
* #SharadPawar
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
