माजी जि.प.सदस्य अशोक पारदळे पुन्हा भाजपमध्ये..!
डॉ.विनय नातू यांनी जुन्या सहका-याचे केले उत्साहात स्वागत..!
आबलोली (संदेश कदम)….
गुहागर तालुक्यातील भारतीय जनता पार्टीचे जुने जाणते नेते श्री.अशोक पारदळे हे १२ वर्षाच्या कालखंडानंतर पुन्हा भारतीय जनता पार्टी तालुका गुहागर या राजकीय पक्षाच्या प्रवाहात सामील झाले आहेत. श्री. अशोक पारदळे हे पेवे गावचे सरपंच,पेवे विविध कार्यकारी सोसायटीचे चेअरमन आणि रत्नागिरी जिल्हा परिषदेचे सदस्य अशी विविध पदे भारतीय जनता पार्टीच्या माध्यमातून त्यांनी भूषविलेली असताना काही तात्विक कारणांमुळे २०१२ सालात श्री.अशोक पारदळे यांनी भारतीय जनता पार्टीला रामराम ठोकत तत्कालीन आमदार भास्कर जाधव यांच्या नेतृत्वात राष्ट्रवादीमध्ये प्रवेश केला होता. मात्र १२ वर्षाच्या प्रदीर्घ कालखंडानंतर पुन्हा श्री.अशोक पारदळे भाजपवासी झाले आहेत. आपल्या या जुन्या जाणत्या व विश्वासू सहका-याचे गुहागर विधानसभा निवडणूक प्रमुख, माजी आमदार डॉ.विनय नातू यांनी उत्साहात स्वागत केले.श्री.अशोक पारदळे यांच्या पुनर्रप्रवेशाच्या वेळी तालुकाध्यक्ष निलेश सुर्वे, अशोक पारदळे यांचे जुने सहकारी गुहागर तालुका पंचायत समितीचे माजी उपसभापती बावाशेठ भालेकर,आरेचे माजी सरपंच श्रीकांत महाजन, कारुळचे माजी सरपंच मंगेश जोशी, जिल्हा परिषदेचे माजी सदस्य सुरेश चौगुले,आरेचे माजी उपसरपंच साईनाथ कळझुणक,भाजपाचे ज्येष्ठ व्यक्तिमत्व हिदायत भाई मुखरी, सरचिटणीस सचिन ओक, अंकुश पिलवलकर, गुरुनाथ कारेकर आदींसह बहुसंख्य भाजप पदाधिकारी उपस्थित होते. यावेळी भारतीय जनता पार्टीचे गतवैभव या गुहागर विधानसभेमध्ये पुन्हा उभे करण्यासाठी, नातूसाहेबांना पुन्हा विधानसभेमध्ये पाठवण्यासाठी मी कटिबद्ध असून मी माझ्या जिल्हा परिषद गटापुरताच नव्हे तर संपूर्ण गुहागर तालुका पिंजुन काढणार असून शतप्रतिशत भाजपासाठी आयुष्याच्या शेवटच्या क्षणापर्यंत प्रयत्न करणार असल्याचे अशोक पारदळे यांनी सांगितले आहे. पारदळे यांच्या पुर्नप्रवेशामुळे गुहागर तालुका भारतीय जनता पार्टीमध्ये उत्साहाचे वातावरण निर्माण झाले असून या पुढील कालखंडात निवडणुकांपर्यंत अनेक जुने जाणते विश्वासू सहकारी पुन्हा भारतीय जनता पार्टीमध्ये सक्रिय होणार असुन जुन्या जाणत्या सहकाऱ्यांबरोबरच विरोधी गटातील अनेक नेतृत्व भारतीय जनता पार्टीच्या प्रवाहात येणार असल्याचे तालुकाध्यक्ष निलेश सुर्वे यांनी सांगितले.
Author: Sandesh Kadam
संदेश कदम, अबलोली. रत्नागिरी वार्ताहर. डिजिटल मिडिया गूहागर तालुका समन्वयक
