‘स्वामी गगनगिरी महाराजांच्या निसर्गरम्य मनोरी आश्रमात दर्शन सोहळा व लक्ष लक्ष दीप महोत्सवाचे आयोजन
नवीमुंबई (मंगेश जाधव)
दरवर्षी प्रमाणे याही वर्षी विश्वगौरवविभूषित योगीराज श्रीनाथ गगनगिरी महाराज यांच्या प्रेरणा आशीर्वादाने स्थापन झालेल्या श्री क्षेत्र मनोरी आश्रम स्थानी महासिद्धयोगी स्वामी गगनगिरी महाराज दर्शन सोहळा सप्ताह व अखिल मानव जातीच्या कल्याणासाठी व विश्वशांतीसाठी आयोजित केलेला लक्षदीप सोहळा हा कार्यक्रम मुंबई जवळील मालाड उपनगरापाशी असलेल्या नितांतसुंदर अश्या मनोरी येथील प्रसिद्ध गगनगिरी आश्रमात संपन्न होणार आहे
या धार्मिक सोहळ्यास दसरा दिनी म्हणजेच गुरुवार दिनांक २ ऑक्टो. पासून स्वामी गगनगिरी महाराज दर्शन सोहळ्यास प्रारंभ होणार असून या सोहळ्याची बुधवार दिनांक ८ ऑक्टोबर रोजी काल्याचे कीर्तनाने सांगता होणार आहे.
याप्रसंगी मनोरी येथील जागृत देवस्थान म्हणून प्रसिद्ध असलेल्या आई कर्जाई देवी मंदिर पासून ते आश्रम स्थानापर्यंत महाराजांचे मूर्तीची भव्य पालखी मिरवणूक काढण्यात येणार आहे व या सोहळ्यास प्रारंभ होणार असून दर्शन सोहळा सप्ताहास सुरुवात होईल.यावेळी श्री.सत्यनारायण महापूजा संपन्न होईल.
सदर धार्मिक सोहळ्याच्या निमित्ताने दररोज काकड आरती, हरिपाठ, पारायण ,होमहवन भंडारा आदी कार्यक्रम होणार असून त्यानतंर महाआरती व महाप्रसादाचे वाटप करण्यात येणार आहे. तसेच संपूर्ण सप्ताहात अनेक मान्यवर कीर्तनकारांची कीर्तने,प्रवचने, कथा निरूपण आदी कार्यक्रम संपन्न होणार असून या प्रसंगी जागर गोंधळ,नवचंडी याग, तसेच 56 भोग नैवेद्य अर्पण सोहळा संपन्न होणार आहे.
या उत्सवाच्या निमित्ताने सुप्रसिद्ध शाहीर रूपचंद चव्हाण यांचे शाहिरी व भक्ती गीते कार्यक्रम सादर होणार असून कल्याण येथील दीपक रूमडे यांचे बहुउद्देशीय संस्थेचे वतीने” श्री गुरु सप्तशती चे सामुदायिक पारायण करण्यात येणार आहे.तसेच ह. भ. प. सौ उमा तेंडोलकर यांचे काल्याचे कीर्तनाचा कार्यक्रम होणार आहे.
या उत्सवाचे या प्रमुख वैशिष्ट्य म्हणजे स्वामी गगनगिरी महाराजांनी आपल्या हयातीत कोजागिरी पौर्णिमेनिमित्ताने सुरू केलेला भव्य दिव्य लक्ष-लक्ष दीपसोहळा महोत्सव.यंदाचे हे २५ वे वर्ष असून या रौप्य महोत्सवी वर्षा निमित्ताने भाविक भक्तांमध्ये प्रचंड उत्साह व आनंदी वातावरण असून आजही महाराजांच्या कृपाशिर्वादाने हा लक्ष लक्ष दीप महोत्सव अव्याहत सुरू असून यावेळेस सोमवार दिनांक ६ ऑक्टोबर रोजी सायंकाळी ६ वाजता,हजारो मुंबई करांचे वैभवशाली उपस्थितीत तसेच विविध आश्रमातील संत-साधू-भक्तमंडळींचे चैतन्यदायी उपस्थितीत सदर लक्ष- लक्ष दीप महोत्सव संपन्न होणार आहे.
सदरहू दर्शन-सोहळा कार्यक्रमास तसेच चैतन्यदायी लक्ष-लक्ष दीप महोत्सवात जास्तीत जास्त भाविक-भक्तांनी आवर्जून उपस्थित राहून दर्शन-आशिर्वादाचा लाभ घ्यावा,व सहकार्य करावे,असे आवाहन मनोरीआश्रम चे प्रमुख निषादजी पाटणकर यांनी केले आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
