संजय शिरसाटांचा अजब पॅटर्न! उपोषणकर्ता आपल्या दारी; आंदोलकालाच घरी बोलावून ज्यूस पाजला!

छत्रपती संभाजीनगरमध्ये ‘उपोषणकर्ता आपल्या दारी’ — पालकमंत्र्यांना शेतकऱ्यांना भेटायला वेळ नाही का, असा सवाल!

📰

छत्रपती संभाजीनगर –
‘शासन आपल्या दारी’ या योजनेचा नवा अवतार म्हणजे ‘उपोषणकर्ता आपल्या दारी’ असं म्हणावं लागेल! कारण शिंदे गटाचे मंत्री व छत्रपती संभाजीनगरचे पालकमंत्री संजय शिरसाट यांनी उपोषणकर्त्यालाच घरी बोलावून घेतल्याची विचित्र घटना घडली आहे.

कन्नड तालुक्यातील अतिवृष्टीग्रस्त शेतकऱ्यांना नुकसानभरपाई आणि तत्काळ सरसकट कर्जमाफी (Loan Waiver) जाहीर करण्यासाठी संदीप विजयकुमार सेठी यांनी 10 ऑक्टोबरपासून तहसील कार्यालयासमोर बेमुदत उपोषण सुरू केलं होतं. तहसीलदार व अधिकाऱ्यांनी अनेकदा विनंती करूनही त्यांनी “जोपर्यंत पालकमंत्री येऊन आश्वासन देत नाहीत, तोपर्यंत उपोषण मागे घेणार नाही,” असा ठाम पवित्रा घेतला होता.

मात्र, मंत्री शिरसाट यांना ‘बिझी शेड्युल’ असल्याचं सांगत त्यांच्या कार्यालयातून उपोषणकर्त्यांनाच छत्रपती संभाजीनगरला बोलवण्यात आलं. अखेर तहसीलदार, पोलिस आणि कार्यकर्त्यांच्या उपस्थितीत सेठी यांना रुग्णवाहिकेतून मंत्री शिरसाट यांच्या घरी आणण्यात आलं. त्यानंतर शिरसाट यांनी सेठी यांच्या मागण्या मान्य करण्याचं आश्वासन दिलं आणि त्यांच्या हस्ते ज्यूस पाजून उपोषण सोडवण्यात आलं.

या प्रकारामुळे शेतकरी वर्तुळात संताप व्यक्त होत आहे. छत्रपती संभाजीनगर ते कन्नड हे अवघं पाऊण तासाचं अंतर असूनही पालकमंत्री शेतकऱ्यांना भेटायला गेले नाहीत, यावरून “शेतकऱ्यांसाठी सरकारला वेळ नाही का?” असा सवाल उपस्थित केला जात आहे.

विशेष म्हणजे हा प्रकार रात्री साडेनऊ-दहा वाजताच्या सुमारास घडला. “पालकमंत्र्यांनीच मला बोलावलं,” असं खुद्द उपोषणकर्ते सेठी यांनी माध्यमांसमोर सांगितलं. या घटनेनंतर सोशल मीडियावर शिरसाट यांच्यावर टीकेची झोड उठली आहे. मात्र, या संपूर्ण प्रकरणावर शिरसाट यांनी अद्याप कोणतीही प्रतिक्रिया दिलेली नाही.

—

🔖 हॅशटॅग्स:

#संजयशिरसाट #उपोषण #शेतकरीआंदोलन #छत्रपतीसंभाजीनगर #कन्नड #कर्जमाफी #शासनआपल्यादारी #महाराष्ट्रराजकारण #RatnagiriVartahar

—

Author: RV.Ratnagiri Office

रत्नागिरी वार्ताहर डिजिटल बातमी पत्र - एडिटर विभाग