मुंबई-गोवा महामार्ग पूर्णत्वाला नेणार; पाऊस थांबल्यावर कामाला वेग – खा. नारायण राणे यांची ग्वाही

🏗️ मुंबई-गोवा महामार्ग पूर्णत्वाला नेणार; पाऊस थांबल्यावर कामाला वेग – खा. नारायण राणे यांची ग्वाही

चिपळूण (प्रतिनिधी): मुंबई-गोवा महामार्गाच्या (Mumbai-Goa Highway) चौपदरीकरणाचे काम लवकरच पूर्ण केले जाईल, अशी महत्त्वपूर्ण ग्वाही केंद्रीय माजी मंत्री व खासदार नारायण राणे यांनी चिपळूण येथे दिली. सध्याचा पावसाळा संपल्यानंतर दोन ते तीन महिन्यांत हे काम पूर्ण करण्यासाठी प्रयत्न केले जातील, असे त्यांनी स्पष्ट केले.

खासदार राणे चिपळूण येथे आयोजित जनता दरबारानंतर पत्रकारांशी संवाद साधत होते.

🛣️ महामार्ग पूर्णत्वाची ग्वाही

पत्रकारांनी विचारलेल्या मुंबई-गोवा महामार्गाच्या प्रश्नावर उत्तर देताना खा. नारायण राणे म्हणाले,

“सध्या पाऊस खूप आहे. पाऊस जाऊ दे. आम्हाला दोन-तीन महिने मिळू दे. मुंबई-गोवा महामार्ग पूर्ण होईल. केंद्रीय परिवहन मंत्री नितीन गडकरी माझे चांगले मित्र आहेत आणि मित्रत्वाचा उपयोग मुंबई-गोवा महामार्गाच्या चौपदरीकरण पूर्णत्वासाठी करून घेऊ.”

यावेळी त्यांनी महामार्गाचे काम तातडीने पूर्ण करण्यावर भर दिला.

🔥 ठाकरे पिता-पुत्रावर टीकास्त्र

यावेळी खासदार राणे यांनी शिवसेना (उद्धव बाळासाहेब ठाकरे) पक्षप्रमुख उद्धव ठाकरे आणि आमदार आदित्य ठाकरे यांच्यावर जोरदार टीका केली.

• उद्धव ठाकरे यांच्यावर टीका: “उद्धव ठाकरे यांना चांगले काही बोलता येते का? शुद्ध विचार देता येतात का?” असा सवाल त्यांनी उपस्थित केला. तसेच देशाचे गृहमंत्री अमित शाह यांच्यावर केलेल्या टीकेला उत्तर देताना ते म्हणाले की, बाळासाहेब ठाकरे ज्या कलम ३७० बद्दल बोलायचे, ते कलम अमित शाह यांनी रद्द केले. अशा महान नेतृत्वावर तोंडात येईल ते बोलणे योग्य नाही. उद्धव ठाकरे यांचे नाव न घेण्यासारखा माणूस आहे, असेही ते म्हणाले.
• संजय राऊत आणि आदित्य ठाकरे: खासदार राणे यांनी संजय राऊत यांच्यावरही टीका करताना म्हटले की, “संजय राऊत शिवसेनेसाठी कुबडी बनला आहे. थोडे दिवस जाऊ दे, त्याचीच कुबडी बाजूला करून देतील.” तसेच, आदित्य ठाकरे यांच्याबद्दल विचारले असता, “आदित्य ठाकरे कोण? त्याचे विधायक सामाजिक कार्य काय आहे?” असा सवाल त्यांनी उपस्थित केला.

🌾 शेतकऱ्यांच्या मदतीचे आश्वासन

शेतकऱ्यांच्या प्रश्नांवर बोलताना खा. राणे यांनी सरकार शेतकऱ्यांच्या पाठीशी ठामपणे उभे असल्याचे सांगितले.

• कोकणातील नुकसानीबाबत: “कोकणातील पिकांच्या नुकसानीसंदर्भात सर्वेक्षण सुरू आहे आणि याबाबत शासन लवकरच मदत जाहीर करेल,” अशी ग्वाही त्यांनी दिली.
• चिपळूण पुररेषा: चिपळूण शहरातील लाल-निळ्या पुररेषा संदर्भात पाठपुरावा सुरू असून, चिपळूणवासीयांना अपेक्षित निर्णय लवकरच मिळेल, असे आश्वासनही त्यांनी दिले.

उपस्थित मान्यवर

यावेळी जनता दरबारात माजी आमदार विनय नातू, भाजप नेते प्रशांत यादव, उत्तर रत्नागिरी जिल्हाध्यक्ष सतीश मोरे, दक्षिण रत्नागिरी जिल्हाध्यक्ष राजेश सावंत, भाजप चिपळूण तालुकाध्यक्ष विनोद भुरण, आणि शहराध्यक्ष शशिकांत मोदी आदी मान्यवर उपस्थित होते.