रत्नागिरी नगर परिषदेतील बोगस मतदार : ७,५०० हरकतींवर प्रक्रिया पूर्ण

October 30, 2025
5:14 pm
Post Views: 214

🗳️ रत्नागिरी नगर परिषदेतील बोगस मतदार : ७,५०० हरकतींवर प्रक्रिया पूर्ण

३१ ऑक्टोबरला अंतिम मतदार यादी जाहीर होणार; बोगस मतदार दाव्यांनंतर प्रशासनाची सखोल चौकशी

रत्नागिरी : रत्नागिरी नगर परिषद सार्वत्रिक निवडणुकीच्या पार्श्वभूमीवर मतदार यादीतील तक्रारींवर प्रशासनाने मोठ्या प्रमाणावर कारवाई केली आहे. प्रारूप मतदार यादीवर आलेल्या ७,५०० हरकतींवरील तपासणी व दुरुस्तीची प्रक्रिया पूर्ण करण्यात आली असून, अंतिम मतदार यादी ३१ ऑक्टोबर २०२५ रोजी प्रसिद्ध होणार आहे.

यादी प्रसिद्ध झाल्यानंतर अनेक नागरिकांनी एका प्रभागातून दुसऱ्या प्रभागात मतदार दिसणे, प्रभागात राहिवासी नसतानाही नाव असणे, तसेच चुकीने नावांची अदलाबदल होणे अशा स्वरूपाच्या तक्रारी दाखल केल्या होत्या. या सर्व तक्रारींवर नगर परिषद प्रशासनाने स्थळ पाहणी व नोंदींचा अभ्यास करून आवश्यक दुरुस्ती सुचवली आहे.

यातील ३५० मतदारांवर विशेष आक्षेप नोंदवून त्यांना नोटिसा बजावण्यात आल्या. २९ ऑक्टोबर रोजी प्रांताधिकारी जीवन देसाई यांच्या उपस्थितीत झालेल्या सुनावणीत संबंधितांना आपली बाजू मांडण्याची संधी देण्यात आली.

तत्पूर्वी, शिवसेना (उद्धव बाळासाहेब ठाकरे) पक्षाचे उपनेते बाळ माने यांनी शहर मतदार यादीत मोठ्या प्रमाणात बोगस मतदारांचा आरोप करत, सुमारे २३ हजार बोगस मतदार असल्याचा दावा जिल्हा निवडणूक विभागाकडे पुराव्यानिशी दाखल केला होता. या दाव्यानंतर प्रशासनाने चौकशी प्रक्रिया गतीमान केली.

अंतिम यादी जाहीर झाल्यानंतर रत्नागिरीतील मतदारांची अचूक संख्या निश्चित होणार असून, त्यानंतर राजकीय पक्षांच्या रणनीतींना निवडणुकीपूर्वी वेग मिळणार आहे.