⚠️ राजस्थानमध्ये भीषण अपघात — बसची ट्रेलरला धडक; १८ जणांचा जागीच मृत्यू!
फलोदीतील माटोडा परिसरात दुर्दैवी घटना, मुख्यमंत्री भजनलाल शर्मा यांनी व्यक्त केला शोक
राजस्थान ~राजस्थानमधील जोधपूर जिल्ह्यातील फलोदी तालुक्यात माटोडा परिसरात आज पहाटे एक भीषण अपघात घडला. पर्यटकांना घेऊन जाणाऱ्या एका बसने भारतमाला एक्सप्रेसवेवर उभ्या असलेल्या ट्रेलरला जोरदार धडक दिली. ही धडक इतकी भीषण होती की बसचा अक्षरशः चुराडा झाला असून, १८ प्रवाशांचा मृत्यू झाला, तर ३ ते ४ जण गंभीर जखमी असल्याची प्राथमिक माहिती पोलिसांनी दिली आहे.
मिळालेल्या माहितीनुसार, हे सर्व भाविक बिकानेरमधील कोलायत येथे दर्शन घेऊन सुरसागरकडे परतत होते, त्यावेळी ही दुर्घटना घडली. स्थानिक प्रशासन आणि पोलीस यंत्रणा तातडीने घटनास्थळी पोहोचली असून, बचावकार्य सुरू आहे. पोलिस आयुक्त ओमप्रकाश आणि अधीक्षक विकास राजपुरोहित हेही रुग्णालयात दाखल जखमींची विचारपूस करत आहेत.
दरम्यान, राजस्थानचे मुख्यमंत्री भजनलाल शर्मा यांनी या अपघाताबद्दल गहिवरून शोक व्यक्त केला आहे. त्यांनी ‘एक्स’वर लिहिलं आहे की —
> “फलोदीच्या माटोडा भागात झालेल्या रस्ते अपघातात झालेली जीवितहानी अत्यंत दुःखद आणि हृदयद्रावक आहे. सर्व जखमींवर योग्य उपचार होण्यासाठी निर्देश दिले आहेत. मृतांच्या आत्म्यांना शांती लाभो आणि जखमी लवकर बरे होवोत, ही ईश्वरचरणी प्रार्थना.”
या भीषण अपघातामुळे राजस्थानभरात हळहळ व्यक्त केली जात आहे.
—
🔖 हॅशटॅग्स:
#RajasthanAccident #JodhpurTragedy #PhalodiBusCrash #BreakingNews #IndianRoadSafety #RatnagiriVartahar
–
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
