🗞️ मोठी बातमी: अॅडव्होकेट असीम सरोदे यांची वकिलीची सनद तीन महिन्यांसाठी रद्द – बार कौन्सिलचा मोठा निर्णय
| पुणे
पुण्यातील सुप्रसिद्ध विधिज्ञ अॅडव्होकेट असीम सरोदे यांच्या वकिलीची सनद तीन महिन्यांसाठी रद्द करण्यात आली आहे. महाराष्ट्र आणि गोवा बार कौन्सिलने सोमवारी हा निर्णय घेतला.
अॅडव्होकेट विवेकानंद घाटगे यांच्या अध्यक्षतेखालील समितीने चौकशी करून हा अहवाल सादर केला.
सरोदेंवर आरोप होता की त्यांनी एका सार्वजनिक कार्यक्रमात न्यायव्यवस्था, राज्यपाल आणि विधानसभा अध्यक्षांविषयी आक्षेपार्ह आणि अवमानकारक विधानं केली होती.
त्यांच्या या वक्तव्यांमुळे न्यायसंस्थेचा अपमान झाला आणि नागरिकांमध्ये न्यायव्यवस्थेबद्दल अविश्वास निर्माण झाला, अशी तक्रार दाखल करण्यात आली होती.
तक्रारदाराने 19 मार्च 2024 रोजी सरोदेंना लेखी माफी मागण्याची संधी दिली होती. मात्र सरोदेंनी ती नाकारल्याने बार कौन्सिलने तीन महिन्यांची सनद निलंबनाची कारवाई केली.
समितीने सरोदेंचे भाषण, ट्रान्सक्रिप्ट आणि व्हिडिओ क्लिप तपासल्या. व्हिडिओमध्ये सरोदे “राज्यपाल फालतू आहेत” आणि “न्यायालय सरकारच्या दबावाखाली आहे” असे म्हणताना दिसत होते. समितीच्या मतानुसार, वकील हा “Officer of the Court” असल्याने त्याने न्यायसंस्थेविषयी संयम आणि सन्मान राखणे अपेक्षित आहे.
दरम्यान, असीम सरोदे यांनी या निर्णयावर प्रतिक्रिया देताना सांगितले की,
“मी कोणत्याही प्रकारे न्यायालयाचा किंवा संविधानिक पदांचा अपमान केलेला नाही. माझे वक्तव्य हे लोकशाहीतील रचनात्मक टीका होती. ‘फालतू’ हा शब्द मी अपमानार्थ नव्हे, तर सर्वसामान्य भाषेत वापरला.”
सरोदे हे सर्वोच्च न्यायालयात शिवसेना पक्ष आणि चिन्ह वादाच्या प्रकरणात सहभागी वकिलांपैकी एक असल्याने, या निर्णयाचा त्या खटल्यावरही परिणाम होण्याची शक्यता आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
