मतमोजणी २१ डिसेंबरलाच; सर्वोच्च न्यायालयाने दिली अंतिम मुदत
नगरपालिका-नगरपंचायत निवडणुकांच्या प्रक्रियेला विलंब न करता ३१ जानेवारीपूर्वी पूर्णता देण्याचे निर्देश
सविस्तर बातमी :
राज्यातील नगरपालिका आणि नगरपंचायतींच्या निवडणुकांसाठी २ डिसेंबर रोजी मतदान झाले. मात्र काही नगरपालिकांमधील मतदान प्रक्रिया शेवटच्या क्षणी पुढे ढकलून ते २० डिसेंबरला घेण्यात येणार असल्याचे जाहीर झाले. त्यामुळे सर्वच निवडणुकांच्या मतमोजणीला विलंब झाला आणि विषय उच्च न्यायालयात गेला. नागपूर खंडपीठाने मतमोजणी पुढे ढकलण्याचे आदेश दिल्यानंतर हा निर्णय सर्वोच्च न्यायालयात आव्हान करण्यात आला होता.
आज झालेल्या सुनावणीत सरन्यायाधीश सूर्य कांत आणि न्यायमूर्ती जॉयमाल्या बागची यांच्या पीठाने उच्च न्यायालयाच्या निर्णयाला मान्यता देत मतमोजणी २१ डिसेंबरलाच होणार असल्याचे स्पष्ट केले.
सर्वोच्च न्यायालयाने निवडणूक आयोगाला कठोर निर्देश देत म्हटले की, निवडणूक प्रक्रिया ठरलेल्या वेळापत्रकात म्हणजेच ३१ जानेवारीपूर्वी पूर्ण झाली पाहिजे, तसेच कोणतेही कारण देऊन निवडणुका पुढे ढकलू नयेत.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
