नगर परिषद व नगर पंचायत निवडणुकीच्या मतमोजणीसाठी यंत्रणा सज्ज
२१ डिसेंबर रोजी मतमोजणी; कडेकोट सुरक्षा व्यवस्था – जिल्हाधिकारी मनुज जिंदल
रत्नागिरी 🙁 जिमका)
रत्नागिरी जिल्ह्यातील चार नगर परिषद आणि तीन नगर पंचायतीच्या निवडणुकांची मतमोजणी सोमवार, दि. २१ डिसेंबर रोजी होणार असून, त्यासाठी संपूर्ण निवडणूक यंत्रणा सज्ज असल्याची माहिती जिल्हाधिकारी मनुज जिंदल यांनी पत्रकार परिषदेत दिली.
यावेळी बोलताना जिल्हाधिकारी श्री. जिंदल म्हणाले की, राज्य निवडणूक आयोगाच्या दि. २९ नोव्हेंबर २०२५ रोजीच्या आदेशानुसार न्यायालयीन अपील दाखल झाल्यामुळे रत्नागिरी नगर परिषदेमधील प्रभाग क्रमांक १० (१० अ व १० ब) साठी स्वतंत्रपणे दि. २० डिसेंबर रोजी मतदान होणार आहे. या मतदानासाठी एकूण चार मतदान केंद्र निश्चित करण्यात आली आहेत.
दरम्यान, यापूर्वी जिल्ह्यातील सात नगर परिषद व नगर पंचायतीमधील एकूण १०० प्रभागांसाठी निवडणूक प्रक्रिया पार पडली असून, या निवडणुकांमध्ये जिल्ह्यात सरासरी ६८.१४ टक्के मतदान झाले आहे.
मतमोजणीपूर्वी स्ट्राँग रूमच्या सुरक्षेसाठी एसआरपी व पोलीस दलामार्फत कडेकोट बंदोबस्त ठेवण्यात आला आहे. स्ट्राँग रूमचे सिक्युरिटी ऑडिट पूर्ण करण्यात आले असून, आत व बाहेरील परिसरात सीसीटीव्ही कॅमेरे बसविण्यात आले आहेत. तसेच अग्निशमन यंत्रणा, स्वच्छतेसाठी व्हॅक्युम क्लिनर व्यवस्था आणि वाळवी प्रतिबंधक उपाययोजना करण्यात आल्याचेही जिल्हाधिकारी श्री. जिंदल यांनी सांगितले.
दि. २१ डिसेंबर रोजी होणाऱ्या मतमोजणीसाठी सर्व प्रशासकीय व सुरक्षा व्यवस्था पूर्ण असून, निवडणूक प्रक्रिया शांततेत आणि पारदर्शकपणे पार पाडण्यासाठी प्रशासन सज्ज असल्याचे त्यांनी स्पष्ट केले.
—
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
