हेदवी जुवेवाडी तरुण विकास मंडळ व महिला मंडळाचे वार्षिक कौटुंबिक स्नेहसंमेलन उत्साहात संपन्न
गोरेगाव येथील छोटा काश्मीर येथे ग्रामस्थांची मोठी उपस्थिती; शालेय विद्यार्थ्यांचा गुणगौरव, हळदीकुंकू व विविध खेळांनी रंगला सोहळा
मुंबई – गोरेगाव, प्रतिनिधी :
गुहागर तालुक्यातील हेदवी गावच्या जुवेवाडी येथील तरुण विकास मंडळ आणि महिला मंडळ यांच्या वतीने सालाबादप्रमाणे यंदाही वार्षिक कौटुंबिक स्नेहसंमेलनाचे आयोजन मुंबईतील गोरेगाव येथील छोटा काश्मीर येथे उत्साहात करण्यात आले. विविध कारणांनी मुंबई, पुणे तसेच इतर ठिकाणी वास्तव्य असलेल्या ग्रामस्थांनी वर्षातून एकदा तरी एकत्र यावे, गावाशी नाळ जोडून ठेवावी आणि नवतरुण पिढीला आपल्या परंपरांची ओळख करून द्यावी या उद्देशाने हा कार्यक्रम आयोजित करण्यात आला होता.
या स्नेहसंमेलनाला ग्रामस्थ व महिला मंडळींची लक्षणीय उपस्थिती लाभली. गावाकडील पारंपरिक रुढी-परंपरा जपण्याचा आणि सामाजिक एकोपा वाढवण्याचा संदेश या कार्यक्रमातून देण्यात आला. सन २०१२ पासून सलग १५ वर्षे हा उपक्रम सातत्याने राबविला जात असून, यंदाही तो तेवढ्याच उत्साहात पार पडला.
कार्यक्रमात शालेय विद्यार्थ्यांचा गुणगौरव सोहळा, महिलांसाठी हळदीकुंकू कार्यक्रम तसेच विविध मनोरंजनात्मक खेळांचे आयोजन करण्यात आले. शेवटच्या टप्प्यात सर्व मुलांचा सत्कार करून त्यांना आकर्षक भेटवस्तू देण्यात आल्या. तसेच जुवेवाडीच्या सामाजिक व सांस्कृतिक प्रगतीसाठी योगदान देणाऱ्या ग्रामस्थ व महिला मंडळ पदाधिकाऱ्यांचाही विशेष सत्कार करण्यात आला.
तरुण विकास मंडळाचे अध्यक्ष श्री. संतोष सुवारे, उपाध्यक्ष श्री. विठोबा घाणेकर, सचिव श्री. शशिकांत जाधव, उपसचिव श्री. वैभव निकम, खजिनदार श्री. रघुनाथ जाधव, उपखजिनदार श्री. कपिल मांडवकर व श्री. प्रफुल निकम तसेच सल्लागार श्री. मिलिंद पाटेकर, श्री. विवेक कातकर, श्री. अशोक पाटेकर, श्री. संतोष घडशी यांनी कार्यक्रमासाठी विशेष परिश्रम घेतले.
महिला मंडळाच्या अध्यक्ष सौ. मिलन आग्रे, उपाध्यक्ष सौ. प्रणाली पानगले, सचिव सौ. प्राप्ती घडशी, उपसचिव सौ. सानवी आग्रे, खजिनदार सौ. वनिता जाधव, उपखजिनदार सौ. संचिता सुवारे तसेच सल्लागार सौ. मधुरा पाटेकर, सौ. रोहिणी पानगले, सौ. शिल्पा संतोष घडशी, सौ. नंदिनी इतापे, सौ. नलिनी निकम आणि सौ. वैशाली निकम यांनीही मोलाचे योगदान दिले.
सकाळपासूनच उपस्थितांसाठी चहा-नाश्ता व दुपारच्या स्नेहभोजनाची उत्तम व्यवस्था करण्यात आली होती. यावर्षी महिला मंडळाचा विशेष व अधिक सहभाग लक्षवेधी ठरला. खेळीमेळीच्या वातावरणात पार पडलेल्या या कार्यक्रमाची सांगता सायंकाळी पाच वाजता राष्ट्रगीताने करण्यात आली.
एकंदरीत, हेदवी जुवेवाडी स्नेहसंमेलनाने सामाजिक ऐक्य, परंपरांचे जतन आणि गावाशी असलेली भावनिक नाळ अधिक दृढ केल्याचे चित्र पाहायला मिळाले.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
