इगतपुरी हादरले! समाजकल्याण वसतिगृहात अल्पवयीन मुलांवर लैंगिक अत्याचार; सात जणांसह अधीक्षकावर गुन्हा दाखल

इगतपुरी: नाशिक जिल्ह्यातील इगतपुरी येथील समाजकल्याण विभागाच्या मुलांच्या वसतिगृहात माणुसकीला काळिमा फासणारी घटना उघडकीस आली आहे. याच वसतिगृहात दहावीत शिकणाऱ्या सात मुलांनी पाचवी ते आठवीच्या वर्गातील लहान मुलांना गुंगीचे औषध देऊन त्यांच्यावर अनैसर्गिक अत्याचार केल्याचा धक्कादायक प्रकार समोर आला आहे. या प्रकरणी सात विधिसंघर्षित बालकांसह, कर्तव्यात कसुरी करणाऱ्या वसतिगृह अधीक्षकावरही गुन्हा दाखल करण्यात आला आहे.

नेमके प्रकरण काय?

मिळालेल्या माहितीनुसार, इगतपुरी येथील समाजकल्याण वसतिगृहात गेल्या सात महिन्यांपासून हा घृणास्पद प्रकार सुरू होता. दहावीत शिकणाऱ्या सात मुलांनी वसतिगृहातीलच पाचवी ते आठवीतील लहान मुलांना गुंगीचे औषध देऊन त्यांच्यावर वारंवार अनैसर्गिक अत्याचार केला. वरिष्ठ वर्गातील मुलांच्या दहशतीमुळे पीडित मुले इतके दिवस गप्प होती. मात्र, हा प्रकार उघडकीस आल्यानंतर संपूर्ण तालुक्यात खळबळ उडाली आहे.

अधीक्षकावरही कारवाईचा बडगा

या प्रकरणातील सर्वात संतापजनक बाब म्हणजे, पीडित मुलांनी या अत्याचाराबाबत वसतिगृह अधीक्षक सुशांत रमेश दूधसागरे यांना माहिती दिली होती. मात्र, त्यांनी या गंभीर घटनेकडे दुर्लक्ष केले. त्यामुळे पोलिसांनी त्यांच्यावरही गुन्हा दाखल केला आहे.

महत्त्वाचे मुद्दे:

• कलमे: आरोपींविरुद्ध ‘पोक्सो’ (POCSO) आणि रॅगिंग प्रतिबंधक कायद्यांतर्गत गुन्हे दाखल.

• कालावधी: हा प्रकार गेल्या सात महिन्यांपासून सुरू होता.

• प्रशासकीय कारवाई: जिल्हा परिषदेच्या समाजकल्याण विभागाने तातडीने चौकशी सुरू केली आहे.

प्रशासनाची कठोर भूमिका

घटनेची माहिती मिळताच जिल्हा परिषदेच्या समाजकल्याण विभागाचे प्रभारी अधिकारी डॉ. संजय शिंदे आणि अधीक्षक मदन बडे यांनी पथकासह घटनास्थळी धाव घेतली. या प्रकरणाची प्राथमिक चौकशी पूर्ण करून अहवाल जिल्हा परिषदेच्या मुख्य कार्यकारी अधिकाऱ्यांना (CEO) सादर करण्यात आला आहे.

“प्रशासन हे प्रकरण अत्यंत गांभीर्याने घेत आहे. मुलांच्या सुरक्षिततेबाबत कोणतीही तडजोड केली जाणार नाही. दोषींवर कठोर कारवाई केली जाईल.”

— डॉ. संजय शिंदे, प्रभारी अधिकारी, समाजकल्याण विभाग.

उच्चस्तरीय चौकशी समितीची स्थापना

जिल्हा परिषदेच्या मुख्य कार्यकारी अधिकाऱ्यांच्या अध्यक्षतेखाली या प्रकरणासाठी एक विशेष चौकशी समिती स्थापन करण्यात येणार आहे. इगतपुरी पोलीस निरीक्षक सारिका आहिरराव यांच्या मार्गदर्शनाखाली उपनिरीक्षक के. पी. भोजने या प्रकरणाचा पुढील तपास करत आहेत.