ठाणे महापालिकेचे उपायुक्त उमेश बिरारी निलंबित; भूसंपादन घोटाळा आणि अनधिकृत बांधकाम प्रकरणी कारवाई
भूसंपादनातील अनियमितता, सरकारी तिजोरीचे नुकसान आणि कर्तव्यात कसुरीचा ठपका
ठाणे महानगरपालिकेचे अतिक्रमण विभागाचे उपायुक्त उमेश बिरारी यांच्यावर राज्य शासनाने निलंबनाची मोठी कारवाई केली आहे. भूसंपादन प्रक्रियेत गंभीर अनियमितता, सरकारी महसुलाचे नुकसान आणि कर्तव्यात हलगर्जीपणा केल्याचा ठपका त्यांच्यावर ठेवण्यात आला आहे.
मिळालेल्या माहितीनुसार, बोरिवली तालुका हद्दीतील भूखंड क्रमांक ४५५ ते ४५८ यांच्या भूसंपादन प्रक्रियेत मोठ्या प्रमाणावर गैरव्यवहार झाल्याचे प्राथमिक चौकशीत समोर आले. जमिनीचा मोबदला ठरवताना प्रचलित बाजारभावाऐवजी सदनिकांचे दर लावून अवास्तव मूल्यांकन करण्यात आले. तसेच भारग्रस्त जमिनीची नियमानुसार वजावट न करता लाभार्थ्यांना अवाजवी फायदा करून दिल्याचा आरोप आहे.
या प्रकरणामुळे सरकारी तिजोरीचे मोठे नुकसान झाल्याचे सांगितले जात आहे. याशिवाय, बिरारी यांच्याकडे महत्त्वाच्या पाच विभागांची जबाबदारी असतानाही शील फाटा परिसरातील अनधिकृत बांधकामांकडे दुर्लक्ष केल्याचा आरोपही करण्यात आला होता.
वादग्रस्त कारभार, प्रशासनातील तक्रारी आणि चौकशीत समोर आलेल्या बाबींच्या पार्श्वभूमीवर राज्य शासनाने अखेर उमेश बिरारी यांच्यावर निलंबनाची कठोर कारवाई केली आहे. या निर्णयामुळे ठाणे महापालिका प्रशासनात मोठी खळबळ उडाली आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
