खंडाळा मध्ये गुजरात पासिंग आईस्क्रीम गाडीवर कारवाई; नियमांकडे दुर्लक्ष उघड
रत्नागिरी : निलेश रहाटे
खंडाळा परिसरात गुजरात पासिंग असलेली एक आईस्क्रीम विक्रीची गाडी विनापरवाना व आवश्यक कागदपत्रांशिवाय व्यवसाय करत असल्याची तक्रार स्थानिक जागरूक नागरिकांनी केली होती. तसेच संबंधित प्रकरणाबाबत मिरवणे ग्रामपंचायतकडेही तोंडी तक्रारी करण्यात आल्या होत्या, मात्र फेरीवाल्यांबाबत कोणतेही ठोस पाऊल उचललेले दिसून आले नाही.
या तक्रारीची दखल घेत रत्नागिरी प्रादेशिक परिवहन कार्यालय (RTO) चे अधिकारी कुंदकुर्तीकर यांनी संबंधित गाडीची तपासणी केली. तपासणीदरम्यान गाडीमध्ये विमा (Insurance) तसेच इतर आवश्यक कागदपत्रांचा अभाव आढळून आला. याशिवाय गाडीमध्ये करण्यात आलेल्या मॉडिफिकेशनसंदर्भातील कोणतीही अधिकृत कागदपत्रे उपलब्ध नसल्याचेही स्पष्ट झाले. नियमांचे उल्लंघन करून आईस्क्रीम व फालुदा विक्री सुरू असल्याचे निदर्शनास आले.
याप्रकरणी RTO अधिकारी कुंदकुर्तीकर यांच्या मार्गदर्शनाखाली संबंधित वाहनावर योग्य ती दंडात्मक कारवाई करण्यात आली आहे. स्थानिक नागरिकांनी या कारवाईचे स्वागत करत, अशा प्रकारे नियम धाब्यावर बसवून व्यवसाय करणाऱ्यांवर कठोर कारवाई व्हावी, अशी मागणी केली आहे.
दरम्यान, “व्यवसाय करावा, मात्र नियमांचे पालन करणे तितकेच गरजेचे आहे,” असा संदेश या कारवाईतून पुन्हा एकदा स्पष्ट झाला आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
