राष्ट्रपाल सावंत खऱ्या अर्थाने समाज शिक्षक – प्रा. मिलिंद जोशी यांचे गौरवोद्गार
“गतस्मृतींची गजबज” पुस्तक प्रकाशन सोहळ्यात मान्यवरांची उपस्थिती; सावंत यांच्या साहित्यिक, सामाजिक योगदानाला भरभरून दाद
बातमी.
तळवली | प्रतिनिधी मंगेश जाधव
“डॉ. बाबासाहेब आंबेडकरांच्या विचारांतून प्रेरणा घेऊन परिवर्तनाच्या वाटेवर प्रामाणिकपणे कार्य करणारे राष्ट्रपाल सावंत हे केवळ शिक्षक नाही, तर खऱ्या अर्थाने समाज शिक्षक आहेत,” अशा गौरवोद्गारांनी प्रा. मिलिंद जोशी (अध्यक्ष, अखिल भारतीय मराठी साहित्य महामंडळ) यांनी लेखक राष्ट्रपाल सावंत यांच्या कार्याचा गौरव केला.
“गतस्मृतींची गजबज” या आत्मकथनपर पुस्तकाचे प्रकाशन चिपळूणमधील शिक्षक पतपेढीच्या सभागृहात रविवारी पार पडले. या कार्यक्रमाचे अध्यक्ष कृषिभूषण डॉ. तानाजीराव चोरगे होते. संस्कृती प्रकाशन, पुणेच्या सुनिताराजे पवार यांच्या हस्ते पुस्तकाचे प्रकाशन झाले. कार्यक्रमास विविध साहित्यिक, सामाजिक, शैक्षणिक क्षेत्रातील मान्यवरांची मोठ्या संख्येने उपस्थिती होती.
प्रा. मिलिंद जोशी पुढे म्हणाले, “राष्ट्रपाल सावंत यांचा लढा व्यक्तीशी नाही, तर व्यवस्थेविरुद्ध आहे. त्यांच्या कवितांमधून शिक्षण, परिवर्तन आणि आंबेडकरी विचार स्पष्ट दिसतो. ‘गतस्मृतींची गजबज’ हे पुस्तक शाळांतील मुलांना रोज वाचून दाखवल्यास, मूल्यशिक्षणाची स्वतंत्र गरज उरणार नाही.”
कार्यक्रमात उपस्थित असलेल्या डॉ. तानाजीराव चोरगे यांनी सावंत यांच्या लेखनातील वास्तव आणि संवेदनशीलतेचे कौतुक करत, “अशा लेखकांनी शंभर पुस्तकं लिहावीत,” असे उद्गार काढले. आसावरी देशपांडे-जोशी आणि संदेश पवार यांनी या पुस्तकाची मार्मिक आणि अभ्यासपूर्ण ओळख करून दिली.
स्वतः लेखक राष्ट्रपाल सावंत यांनी आपल्या संघर्षमय प्रवासाच्या आठवणी कथन करत, “मी शिक्षक झालो, लेखक झालो, सामाजिक चळवळीचा भाग झालो, यामागे माझ्या कुटुंबाचा आणि समाजाचा मोठा वाटा आहे,” असे भावनिक शब्दांत सांगितले. पत्नी अशाताई सावंत यांच्या साथीतून आलेल्या बळाबाबतही त्यांनी कृतज्ञता व्यक्त केली.
कार्यक्रमाचे सूत्रसंचालन धीरज वाटेकर यांनी केले तर आभार प्रदर्शन प्रदीप पवार (संचालक, आंबेडकर वाचनालय) यांनी केले.
कार्यक्रमाला प्रकाश देशपांडे, अरुण इंगवले, शौकत मुकादम, मंगेश पेढांबकर, राजेंद्र आरेकर, सुनिल खेडेकर, संतोष गोणबरे, विनय माळी, धनंजय चितळे, चंद्रकांत सावंत, अमोल भोबस्कर, संतोष कांबळे, यू.व्ही. सदामस्त आदी मान्यवर उपस्थित होते.
हॅशटॅग्स:
#RashtrapalSawant #GatsmrutichiGajabaj #SamajShikshak #DalitLiterature #AmbedkariThought #MarathiBooks #ChiplunEvents #RatnagiriNews
—
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
