नवी मुंबई आंतरराष्ट्रीय विमानतळाला दि.बा. पाटील यांचं नाव द्या: सर्वपक्षीय कृती समितीची मागणी
#NaviMumbaiAirport #DBPatil #RenameAirport #नवीमुंबईविमानतळ #दिबापाटील
नवी मुंबई आंतरराष्ट्रीय विमानतळाला प्रकल्पग्रस्तांचे झुंजार नेते, दिवंगत दि.बा. पाटील यांचं नाव लवकरात लवकर द्यावं, अशी मागणी लोकनेते दि.बा. पाटील आंतरराष्ट्रीय नामकरण सर्वपक्षीय कृती समितीने केली आहे. गुरुवारी (१९ जुलै) समितीच्या शिष्टमंडळाने मुख्यमंत्री देवेंद्र फडणवीस यांची भेट घेऊन यासंदर्भात निवेदन दिलं.
या मागणीला मुख्यमंत्र्यांनी सकारात्मक प्रतिसाद देत, “दिबां”चं नाव विमानतळाला मिळावं यासाठी आवश्यक ते प्रयत्न करू,” असं आश्वासन शिष्टमंडळाला दिलं.
प्रकरण काय आहे?
नवी मुंबई विमानतळाचं काम आता अंतिम टप्प्यात असून लवकरच ते कार्यान्वित होईल. या पार्श्वभूमीवर, या विमानतळाला भूमिपुत्रांचे नेते, दिवंगत दि.बा. पाटील यांचं नाव देण्यात यावं, अशी जोरदार मागणी होत आहे. याच मागणीसाठी सर्वपक्षीय कृती समितीच्या शिष्टमंडळाने मुख्यमंत्री फडणवीस यांची भेट घेतली.
शिष्टमंडळात कोण होतं?
या शिष्टमंडळात माजी केंद्रीय मंत्री कपिल पाटील, राज्याचे मंत्री गणेश नाईक, समितीचे अध्यक्ष दशरथ पाटील, उपाध्यक्ष माजी खासदार लोकनेते रामशेठ ठाकूर, सल्लागार माजी मंत्री जगन्नाथ पाटील, कार्याध्यक्ष माजी खासदार संजीव नाईक, खजिनदार जे.डी. तांडेल, कार्यकारिणी सदस्य अतुल पाटील आणि नवी मुंबईचे माजी महापौर सागर नाईक यांचा समावेश होता. मुख्यमंत्र्यांनी या मागणीवर सकारात्मक प्रतिसाद देत, दि.बा. पाटील यांच्या नावासाठी केंद्रीय स्तरावर पाठपुरावा करण्याचं आश्वासन दिलं.
Author: RV. Reporters
Guhagar Office .. * Ratnagiri vartahar Digital News * ..
