चिपळूण नगरपरिषदेच्या निवडणुका जाहीर; ४२ हजार मतदार सज्ज – महिला मतदार आघाडीवर
१४ प्रभागांतून २८ नगरसेवक निवडणार; ७ डिसेंबरला मतदान, ८ डिसेंबरला मतमोजणी
चिपळूण :
चिपळूण नगरपरिषदेच्या निवडणुका जाहीर झाल्यानंतर प्रशासनिक यंत्रणा पूर्णपणे सज्ज झाली आहे. एकूण ४२ हजार ५८२ मतदार आपला मतदानाचा हक्क बजावणार आहेत. यात २०,९८६ पुरुष आणि २१,५९६ महिला मतदार असून, महिला मतदारांची संख्या अधिक आहे. त्यामुळे यावेळी नगराध्यक्षपद महिलांच्या हाती जाण्याची शक्यता व्यक्त होत आहे.
नगरपरिषदेत एकूण १४ प्रभागांमधून २८ नगरसेवक निवडून येतील, तर नगराध्यक्ष थेट जनतेतून निवडला जाणार आहे. शहरात ४८ मतदान केंद्रे उभारली जाणार आहेत. उमेदवारी अर्ज भरण्याची प्रक्रिया १० नोव्हेंबरपासून सुरू होईल, अशी माहिती प्रांताधिकारी तथा निवडणूक निर्णय अधिकारी आकाश लिगाडे यांनी पत्रकार परिषदेत दिली. यावेळी उपविभागीय पोलिस अधिकारी प्रकाश बेले, मुख्याधिकारी विशाल भोसले आदी उपस्थित होते.
लिगाडे यांनी सांगितले की, निवडणूक कालावधीत आचारसंहितेचे काटेकोर पालन केले जाणार आहे. त्यासाठी १९ विशेष पथके तयार करण्यात आली आहेत, ज्यात ५ फिरती पथके आणि २ अतिरिक्त पथके तैनात राहतील. शहर हद्दीत कापसाळ, पेढे, कळंबस्ते, खेर्डी, गुहागर बायपास, गांधारेश्वर आदी ठिकाणी ५ चेक नाके उभारले जाणार आहेत.
यावेळी एक सखी मतदान केंद्र आणि एक आदर्श मतदान केंद्र तयार करण्यात येईल. पोलिस व प्रशासन शस्त्रे ताब्यात घेणार आहेत. रात्री १० नंतर प्रचार थांबवावा लागेल, तर प्रचाराची मुदत ३० नोव्हेंबर रोजी संपेल.
मतदान ७ डिसेंबर रोजी सकाळी ७ ते सायंकाळी ५ वाजेपर्यंत पार पडेल. तर मतमोजणी ८ डिसेंबर रोजी युनायटेड इंग्लिश स्कूल येथे होईल. तेथेच स्ट्रॉंग रूम तयार करण्यात येणार आहे. मतदानानंतर मतपेट्या स्ट्रॉंग रूममध्ये ठेवण्यात येतील. मतमोजणी सकाळी १० पासून दुपारी १ वाजेपर्यंत पूर्ण करून सर्व निकाल जाहीर केले जातील, असे लिगाडे यांनी सांगितले.
Author: RV. Reporters
Guhagar Office .. * Ratnagiri vartahar Digital News * ..
