अटकेची शक्यता असतानाच मंत्री माणिकराव कोकाटे आजारी; लीलावती रुग्णालयात दाखल

December 17, 2025
6:59 pm
Post Views: 198

मुंबई | प्रतिनिधी

मंत्री माणिकराव कोकाटे यांना नाशिक जिल्हा व सत्र न्यायालयाने दोन वर्षांची कारावासाची शिक्षा सुनावल्यानंतर त्यांच्या अटकेची प्रक्रिया सुरू झाली असून, त्यांच्याविरोधात अटक वॉरंटही जारी करण्यात आले आहे. दरम्यान, अटकेची शक्यता असतानाच माणिकराव कोकाटे आजारी पडल्याची माहिती समोर आली असून, त्यांना उपचारासाठी मुंबईतील लीलावती रुग्णालयात दाखल करण्यात आले आहे.

कमी दरात सदनिका खरेदी केल्याचा गुन्हा सिद्ध झाल्यानंतर न्यायालयाने कोकाटे यांना दोषी ठरवले आहे. सत्र न्यायालयाने दिलेला निर्णय कायम ठेवल्याने कोकाटे यांच्यावर अटकेची टांगती तलवार असून, हायकोर्टाकडून शिक्षेला स्थगिती मिळेपर्यंत त्यांना अटक होण्याची शक्यता आहे. लोकप्रतिनिधी कायद्यानुसार दोन वर्षे किंवा त्याहून अधिक शिक्षा झाल्यास आमदारकी रद्द होण्याची तरतूद असल्याने, कोकाटे यांची आमदारकीही धोक्यात आली आहे.

जिल्हा न्यायालयाने स्पष्ट आदेश पारित केल्यानंतर याचिकाकर्त्यांच्या वतीने अटक वॉरंट जारी करण्याची मागणी करण्यात आली होती. याचिकाकर्त्यांचे वकील अ‍ॅड. आशुतोष राठोड यांनी सांगितले की, न्यायालयाने माणिकराव कोकाटे यांच्याविरोधात अटकेचे आदेश दिले असून, त्यांनी तातडीने पोलिसांसमोर शरण यावे किंवा पोलिसांनी त्यांना अटक करावी, असे स्पष्ट निर्देश कोर्टाने दिले आहेत.

तसेच लोकप्रतिनिधी कायद्यानुसार दोन वर्षांची शिक्षा झाल्याने कोकाटे यांची आमदारकी रद्द होण्याची प्रक्रिया सुरू झाली असून, नैतिकतेच्या आधारे त्यांनी मंत्रिपदाचा तात्काळ राजीनामा द्यावा, अशी मागणीही करण्यात आली आहे. मुख्यमंत्र्यांकडे विधी व न्याय विभाग असल्याने, कायद्याचे राज्य असल्याचे दाखवण्यासाठी माणिकराव कोकाटे यांचा राजीनामा घ्यावा, असे मत वकिलांनी व्यक्त केले.

दरम्यान, सत्र न्यायालयाच्या निर्णयाविरोधात कोकाटे यांच्या वकिलांकडून हायकोर्टात आव्हान देण्यात येणार आहे. शिक्षेला स्थगिती मिळावी यासाठी प्रयत्न सुरू असल्याचे सांगण्यात आले. कोकाटे यांना शरण येण्यासाठी चार दिवसांची मुदत देण्याची मागणी कोर्टात करण्यात आली होती, मात्र ती नामंजूर करण्यात आली. मात्र अटक वॉरंटाविरोधात हायकोर्टात दाद मागण्याचा पर्याय खुला असल्याची माहिती कोकाटे यांचे वकील अ‍ॅड. मनोज पिंगळे यांनी दिली.

काय आहे प्रकरण?

मुख्यमंत्री स्वेच्छाधिकार योजनेच्या १० टक्के कोट्यातून लाटलेल्या चार सदनिकांच्या प्रकरणात क्रीडामंत्री माणिकराव कोकाटे आणि त्यांचे बंधू विजय कोकाटे यांना दोषी ठरवण्यात आले आहे. नाशिक जिल्हा व सत्र न्यायाधीश पी. एम. बदर यांनी अंतिम सुनावणीत फेब्रुवारी महिन्यात अतिरिक्त मुख्य न्यायदंडाधिकारी न्यायालयाने दिलेला निकाल कायम ठेवत, दोघांनाही दोन वर्षे सक्तमजुरी आणि दहा हजार रुपये दंडाची शिक्षा सुनावली होती. या निर्णयामुळे कोकाटे यांची अटक तसेच आमदारकी रद्द होण्याची प्रक्रिया सुरू झाली असून, राज्याच्या राजकारणात मोठी खळबळ उडाली आहे.