महार रेजिमेंट दिनानिमित्त सुभेदार भाऊ पवार यांचा जीवनगौरव पुरस्काराने सन्मान
प्रदीर्घ देशसेवा आणि सामाजिक कार्याची दखल; महाड येथील चवदार तळे क्रांतीभूमीत झाला गौरव
आबलोली (संदेश कदम) : महार रेजिमेंट दिन आणि यशसिद्धी माजी सैनिक संघाच्या वर्धापन दिनाचे औचित्य साधून महाड येथील चवदार तळे क्रांतीभूमी येथे विशेष कार्यक्रमाचे आयोजन करण्यात आले होते. या कार्यक्रमात भारतीय बौद्ध महासभेचे राष्ट्रीय कार्याध्यक्ष भीमराव आंबेडकर यांच्या हस्ते यशसिद्धी माजी सैनिक संघ, महाराष्ट्र राज्याचे अध्यक्ष सुभेदार भाऊ पवार यांना त्यांच्या प्रदीर्घ देशसेवा आणि सामाजिक कार्याबद्दल जीवनगौरव पुरस्काराने सन्मानित करण्यात आले.
सुभेदार भाऊ पवार हे वयाच्या १९व्या वर्षी, सन १९७० मध्ये भारतीय सैन्यात दाखल झाले. सन १९७१ मध्ये झालेल्या भारत-पाकिस्तान युद्धात त्यांनी सक्रिय सहभाग घेत देशसेवा बजावली. भारतीय सैन्यातील प्रदीर्घ सेवेनंतर निवृत्त झाल्यानंतरही त्यांनी सामाजिक कार्याची नाळ कायम ठेवली.
माजी सैनिकांच्या विविध प्रश्नांसाठी तसेच समाजहिताच्या उपक्रमांमध्ये सुभेदार भाऊ पवार यांनी सातत्याने योगदान दिले आहे. त्यांच्या प्रदीर्घ देशसेवेची, सैनिकी शिस्तीची आणि सामाजिक बांधिलकीची दखल घेत त्यांना हा जीवनगौरव पुरस्कार प्रदान करण्यात आला.
या कार्यक्रमाला यशसिद्धी माजी सैनिक संघाचे माजी अध्यक्ष मेजर सुभेदार दत्ताराम मोहिते, उपाध्यक्ष हवालदार चंद्रकांत कदम, हवालदार प्रभाकर जाधव, मोतीराम मोहिते, सरचिटणीस हवालदार अशोक सावंत, सचिव हवालदार संजय तांबे, कोषाध्यक्ष हवालदार अनंत तांबे, ज्येष्ठ सल्लागार हवालदार शांताराम सावंत, सदस्य हवालदार राजेश पवार यांच्यासह संघाचे पदाधिकारी आणि माजी सैनिक उपस्थित होते.
सुभेदार भाऊ पवार यांच्या सन्मानाबद्दल माजी सैनिक तसेच विविध स्तरातून त्यांचे अभिनंदन करण्यात येत आहे
.Keywords:
महार रेजिमेंट दिन, सुभेदार भाऊ पवार, जीवनगौरव पुरस्कार, यशसिद्धी माजी सैनिक संघ, माजी सैनिक, भारतीय सैन्य, १९७१ भारत-पाकिस्तान युद्ध, महाड, चवदार तळे क्रांतीभूमी, देशसेवा, सामाजिक कार्य, माजी सैनिक संघ महाराष्ट्र
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
