धक्कादायक! बारामतीत बँक मॅनेजरची आत्महत्या, ‘अतिरिक्त कामाचा दबाव’ असल्याचं सुसाईड नोटमध्ये नमूद

धक्कादायक! बारामतीत बँक मॅनेजरची आत्महत्या, ‘अतिरिक्त कामाचा दबाव’ असल्याचं सुसाईड नोटमध्ये नमूद

बारामती, पुणे: पुणे जिल्ह्यातील बारामती येथे एका बँक व्यवस्थापकाने आत्महत्या केल्याची धक्कादायक घटना समोर आली आहे. भिगवण रस्त्यावरील बँक ऑफ बडोदा शाखेचे वरिष्ठ व्यवस्थापक शिवशंकर मित्र यांनी गुरुवारी रात्री उशिरा बँकेतच गळफास घेऊन आयुष्य संपवले. त्यांनी लिहिलेल्या सुसाईड नोटमध्ये कामाच्या अतिरिक्त दबावामुळे आत्महत्या करत असल्याचे स्पष्टपणे नमूद केले आहे.

मिळालेल्या माहितीनुसार, शिवशंकर मित्र हे मूळचे उत्तर प्रदेशातील प्रयागराज येथील होते आणि अनेक वर्षांपासून बँक ऑफ बडोदामध्ये कार्यरत होते. गेल्या काही दिवसांपासून ते वरिष्ठांच्या वाढत्या कामाच्या दबावामुळे तणावात होते, अशी चर्चा आहे. यासंदर्भात त्यांनी कुटुंबीयांशी चर्चा केल्यानंतर स्वेच्छानिवृत्ती घेण्याचा निर्णय घेतला होता.

पाच-सहा दिवसांपूर्वीच त्यांनी बँकेकडे स्वेच्छानिवृत्तीचा अर्ज केला होता, मात्र त्याला कोणताही प्रतिसाद मिळाला नाही. मित्र यांना ही नोकरी सोडायची होती आणि त्यांनी अनेकदा वरिष्ठांना अतिरिक्त दबाव न टाकण्याची विनंती केली होती, परंतु त्यांची कोणीही ऐकले नाही असे सांगितले जात आहे. याच निराशेपोटी त्यांनी काल रात्री उशिरा सुसाईड नोट लिहून आत्महत्या केली.

सुसाईड नोटमधील धक्कादायक खुलासा:

शिवशंकर मित्र यांनी आपल्या शेवटच्या चिठ्ठीत बँकेला विनंती केली आहे की, “आपल्या मृत्यूनंतर बँकेने आपली इच्छा पूर्ण करावी व कोणत्याही कर्मचाऱ्यावर अतिरिक्त दबाव टाकू नये. प्रत्येक कर्मचारी आपल्या परीने शंभर टक्के योगदान देत असतो. त्यामुळे बँकेने अशा प्रकारचा कोणताही दबाव टाकू नये. मी माझी आत्महत्या पूर्ण इच्छेने व जबाबदारीने करत आहे. याला माझ्या कुटुंबाला जबाबदार धरू नये. केवळ आणि केवळ बँकेच्या अतिरिक्त दबावामुळेच मी आत्महत्या करत आहे.”

याशिवाय, त्यांनी आपल्या मृत्यूनंतर नेत्रदान करण्याची इच्छाही व्यक्त केली आहे, ज्यामुळे सर्वांचे डोळे पाणावले. बारामतीतील बँकेच्या शाखेतच आत्महत्येचा असा हा पहिलाच प्रकार असल्याने शहरात मोठी खळबळ उडाली आहे. या घटनेमुळे बँकिंग क्षेत्रातील कर्मचाऱ्यांवरील कामाच्या दबावाचा प्रश्न पुन्हा एकदा ऐरणीवर आला आहे.

#Baramati #BankManagerSuicide #ShivshankarMitra #BankOfBaroda #WorkPressure #SuicideNote #PuneNews #BankingSector #EmotionalStress #Atmadhatya #ExtraWorkPressure