शिस्तभंगाच्या कारवाईच्या तयारीत अजित पवार, कृषिमंत्री माणिकराव कोकाटेंना दणका?
मुंबई: राष्ट्रवादी काँग्रेसचे नेते आणि उपमुख्यमंत्री अजित पवार हे कृषिमंत्री माणिकराव कोकाटे यांच्यावर कठोर कारवाई करण्याच्या तयारीत असल्याची माहिती विश्वसनीय सूत्रांकडून मिळत आहे. कोकाटे यांच्या वारंवारच्या वादग्रस्त विधानांमुळे आणि विधानसभेतील अधिवेशनादरम्यान ऑनलाईन रमी खेळतानाचा व्हिडिओ व्हायरल झाल्याने अजित पवार चांगलेच संतप्त झाले आहेत. पुढील आठवड्यापर्यंत त्यांच्यावर कारवाई होण्याची शक्यता वर्तवली जात आहे.
मिळालेल्या माहितीनुसार, अजित पवार यांनी कोकाटे यांना यापूर्वी किमान तीन वेळा तोंडी समज दिली होती आणि त्यांना वादग्रस्त विधाने टाळण्यास सांगितले होते. मात्र, या सूचनांनंतरही त्यांच्या वर्तनात कोणतीही सुधारणा दिसून न आल्याने अजित पवार वैतागले असल्याचे बोलले जात आहे. पक्षातील वरिष्ठ नेत्यांच्या सूचनांकडे दुर्लक्ष केल्याने कोकाटे यांच्यावरील कारवाई अटळ मानली जात आहे.
राष्ट्रवादी काँग्रेसमधील अन्य प्रमुख नेते, सुनिल तटकरे आणि प्रफुल पटेल यांनीही पक्षांतर्गत बैठकांमध्ये या विषयावर आपले मत व्यक्त केले आहे. कोकाटे यांना वारंवार सांगूनही त्यांनी वादग्रस्त विधाने आणि कृती सुरूच ठेवल्याने, आता त्यांच्यावर कारवाई करायची की नाही, हे अजित पवार यांनीच ठरवावे, असे मत या दोन्ही नेत्यांनी व्यक्त केल्याची माहिती सूत्रांनी दिली आहे. यामुळे पक्षांतर्गत कोकाटेंविरोधात एक मजबूत भूमिका तयार झाली आहे.
#अजितपवार #माणिकरावकोकाटे #राष्ट्रवादीकाँग्रेस #राजकीयघडामोडी #शिस्तभंगाचीकारवाई #महाराष्ट्रशासन #राजकारण #मुंबईन्यूज
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
