🟪🟪

तळवली आगरवाडी अंगणवाडीचे सुरेशदादा सावंत यांच्या हस्ते उदघाटन उत्साहात संपन्न

वाढदिवसानिमित्त ग्रामस्थांची शुभेच्छांची अनोखी भेट

आबलोली (संदेश कदम) –
गुहागर तालुक्यातील तळवली आगरवाडी येथील अंगणवाडीचे उदघाटन राष्ट्रवादी काँग्रेस पार्टी (अजित पवार गट) सामाजिक न्याय विभागाचे जिल्हाध्यक्ष व जिल्हा विकास समन्वय समिती सदस्य सुरेश (दादा) सावंत यांच्या हस्ते फीत कापून उत्साहात पार पडले.

विशेष म्हणजे, याच दिवशी सुरेशदादांचा वाढदिवस असल्याने कार्यक्रमाला दुहेरी रंग चढला. केक कापल्यानंतर ग्रामस्थांनी गाणी गाऊन शुभेच्छा दिल्या. तालुका राष्ट्रवादी काँग्रेसकडून या अंगणवाडीचे उदघाटन वाढदिवसाच्या दिवशी आयोजित करून सुरेशदादांना शुभेच्छांची अनोखी भेट देण्यात आली.

या कार्यक्रमाला राष्ट्रवादी काँग्रेसचे जिल्हा उपाध्यक्ष श्रीधर बागकर, तालुकाध्यक्ष साहिल आरेकर, उपाध्यक्ष दीपक शिलधनकर, सामाजिक कार्यकर्ते संतोष सोलकर, तळवलीचे उपसरपंच संतोष जोशी, सदस्य सुनिल मते, अंगणवाडी सेविका सुनिता सांगळे, प्रेरणा पवार, मदतनीस अश्विनी पवार, मितांजली पवार यांच्यासह ग्रामस्थ मोठ्या संख्येने उपस्थित होते.

अंगणवाडीच्या उभारणीसाठी सुरेशदादा सावंत यांच्या पाठपुराव्यामुळे खासदार सुनिल तटकरे व आमदार आदिती तटकरे यांच्या माध्यमातून निधी मंजूर झाला होता. कित्येक वर्षे रखडलेला प्रश्न अखेर मार्गी लागल्याने ग्रामस्थांत समाधान व्यक्त होत आहे.

या वेळी तालुकाध्यक्ष साहिल आरेकर म्हणाले की, “सुरेशदादा जिल्हा परिषदेत गेले तर आपल्या भागाला हक्काचा माणूस मिळेल आणि विकासकामे साध्य होतील.”

मनोगतात सुरेशदादा सावंत म्हणाले, “अंगणवाडी होऊ नये म्हणून अडथळे आणले गेले; मात्र खासदार तटकरे व आमदार तटकरे यांच्या सहकार्याने हे काम पूर्ण झाले. मी फक्त पाठपुरावा केला. पुढेही ग्रामस्थांसाठी विकासकामे साध्य करण्याचा प्रयत्न करीन. संधी मिळाली तर जिल्हा परिषदेतही जाईन.” असे सांगून त्यांनी वाढदिवसाच्या अनोख्या शुभेच्छांबद्दल ग्रामस्थांचे आभार मानले.

✅ हॅशटॅग

#गुहागर #रत्नागिरी #तळवली #अंगणवाडी #सुरेशदादासावंत #राष्ट्रवादीकाँग्रेस #विकासकामे

📸

Author: RV.Ratnagiri Office

रत्नागिरी वार्ताहर डिजिटल बातमी पत्र - एडिटर विभाग