भाकर फाऊंडेशन तर्फे बाल सभेतील सदस्यांची गोरेगाव अग्निशमन केंद्राला शैक्षणिक भेट
नवी मुंबई (प्रतिनिधी : मंगेश जाधव)
बाल अधिकार सप्ताहाच्या दुसऱ्या दिवशी भाकर फाऊंडेशन तर्फे बाल सभेतील सदस्यांसाठी गोरेगाव अग्निशमन केंद्राला शैक्षणिक भेट आयोजित करण्यात आली. या भेटीदरम्यान गोरेगाव अग्निशमन केंद्रातील प्रमुख अधिकारी संतोष इंगोले आणि अंकुश सर यांनी मुलांशी अतिशय खेळीमेळीच्या वातावरणात संवाद साधत मार्गदर्शन केले.
नैसर्गिक आणि मानवनिर्मित आपत्तीच्या वेळी अग्निशमन दल कसे काम करते, अग्निशमन गाड्यांची रचना, वापरातील साहित्य, तसेच कार्यालयीन कामकाजाची पद्धत याबाबत अधिकाऱ्यांनी प्रत्यक्ष प्रात्यक्षिकांसह सविस्तर माहिती दिली.
मुलं घरात एकटी असताना शॉर्टसर्किट किंवा आग लागल्यास स्वतःचा बचाव कसा करावा, तात्काळ कोणते उपाय करावेत याबाबत साध्या आणि सोप्या भाषेत मार्गदर्शन करण्यात आले. धूर किंवा आग दिसताच तात्काळ बाहेर पडणे, ओल्या कापडाने नाक-तोंड झाकणे, शांत राहून मदत मागणे या महत्त्वाच्या सूचना अधिकाऱ्यांनी अधोरेखित केल्या. अग्निशमन दलाचा टोल फ्री नंबर मुलांना सांगून त्या क्रमांकावर मदत कशी मागायची याचेही प्रात्यक्षिक दाखवण्यात आले.
घराबाहेर जाताना “पा-ग-ल” म्हणजे पाणी – गॅस – लाईट बंद करून जाण्याचा छोटा आणि लक्षात राहणारा शॉर्टकट शब्द अधिकाऱ्यांनी मुलांना सांगितला. हा अनोखा उपाय मुलांना विशेष आवडल्याने त्यांनी लगेच तो आत्मसात केला.
झोपडपट्टी परिसरात आग लागल्यावर कसे वातावरण निर्माण होते, लोकांची धावपळ, धूर पसरल्यावर होणारी भिती अशा अनुभवांविषयी मुलांनीही उत्स्फूर्तपणे मोकळेपणाने मते मांडली. त्यानंतर मुलांनी अधिकाऱ्यांना विविध प्रश्न विचारले असून प्रत्येक प्रश्नाचे उत्तर अधिकाऱ्यांनी मुलांच्या भाषेत, सोप्या आणि समजेल अशा शैलीत दिले.
अग्निशमन दलासारख्या संकटाच्या काळात जीव वाचवणाऱ्या यंत्रणेसोबत संवाद साधणे आणि त्यांच्या कार्यपद्धतीची माहिती करून घेणे, हे मुलांच्या ‘माहिती मिळवण्याच्या अधिकाराचा’ (संयुक्त राष्ट्र संघाने मान्यता दिलेला) एक महत्त्वाचा भाग आहे. या शैक्षणिक भेटीमुळे ज्ञान, सुरक्षा आणि जागरूकतेचे अमूल्य संचित मुलांना लाभले, असे मत उपस्थितांनी व्यक्त केले.
या कार्यक्रमास भाकर फाऊंडेशनचे संस्थापक ॲड. दिपक सोनावणे, मंगला कुमठे, जाहिदा शेख, अजय भालेराव, कस्तुरी शाहू, श्लोक गुप्ता यांच्यासह भाकर फाऊंडेशनचे कार्यकर्ते आणि सर्व बाल सभेचे सदस्य उपस्थित होते.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
