पडवे येथील श्री देव गजानन मंदिरात ‘माघी गणेशोत्सव सोहळा २०२६’ चे उत्साहात आयोजन
गुहागर तालुक्यातील प्रसिद्ध गणेश उत्सव. नवसाला पावणारा गणपती म्हणून प्रसिद्धी.
पडवे-सुजीत सुर्वे .
: देव गजानन मंदिर ट्रस्ट, पडवे (ता. गुहागर) यांच्या वतीने दरवर्षीप्रमाणे यंदाही ‘माघी गणेशोत्सव सोहळा २०२६’ मोठ्या उत्साहात साजरा करण्यात येणार आहे. सोमवार, दि. १९ जानेवारी २०२६ ते शुक्रवार, दि. २३ जानेवारी २०२६ या कालावधीत विविध धार्मिक आणि सांस्कृतिक कार्यक्रमांचे आयोजन करण्यात आले आहे.
माघी गणेशोत्सवाचे महत्त्व
हिंदू धर्मशास्त्रानुसार, माघ शुद्ध चतुर्थीला गणपतीचा जन्म झाला, म्हणून या दिवसाला ‘गणेश जयंती’ किंवा ‘वरद चतुर्थी’ असे म्हटले जाते. भाद्रपदातील गणपती हा ‘पार्थिव’ (मातीचा) असतो, तर माघी गणेशोत्सव हा मुख्यत्वे श्रींच्या जन्माचा उत्सव म्हणून साजरा केला जातो. या दिवशी गणेशाची उपासना केल्याने सर्व मनोकामना पूर्ण होतात आणि बुद्धी व समृद्धीची प्राप्ती होते, अशी भाविकांची श्रद्धा आहे.
उत्सवाचे मुख्य आकर्षण आणि वेळापत्रक:
उत्सवाची सुरुवात सोमवार, १९ जानेवारी रोजी सकाळी ८ वाजता मूर्तीच्या विधिवत पूजेने होईल. रात्री स्थानिक आणि निमंत्रित भजनांचे कार्यक्रम रंगतील.
♦२१ जानेवारी (बुधवार): दुपारी ३ वाजता श्री देव गजाननाची वारी आणि रात्री ‘साई प्रासादिक भजन मंडळ, फुणगुस’ यांचा भजनाचा कार्यक्रम होईल.
♦२२ जानेवारी (गुरुवार): हा उत्सवाचा मुख्य दिवस असून सकाळी १० वाजता श्रींची दिंडी मिरवणूक निघेल. सकाळी ११:३० वाजता ह.भ.प. अमृता नवाथे (रत्नागिरी) यांच्या कीर्तनातून ‘श्रींचा जन्मकाळ’ सोहळा संपन्न होईल. त्यानंतर महाप्रसादाचे वाटप करण्यात येईल. रात्री १०:३० वाजता ‘त्रिमूर्ती नाट्य नमन मंडळ, चिपळूण’ यांचा ‘बगनाट्य’ कार्यक्रम सादर होईल.
♦२३ जानेवारी (शुक्रवार): दुपारी महिलांसाठी हळदीकुंकू, मनोरंजनात्मक कार्यक्रम आणि सायंकाळी ‘होम मिनिस्टर’ व ‘रेकॉर्ड डान्स’ स्पर्धांचे आयोजन करण्यात आले आहे. रात्री १० वाजता ढोल-ताशांच्या गजरात श्रींची भव्य रथ मिरवणूक काढण्यात येईल. पहाटे लळीताच्या कीर्तनाने उत्सवाची सांगता होईल.
श्री सत्यनारायण महापूजा:
रविवार, २५ जानेवारी २०२६ रोजी सकाळी १० वाजता श्री सत्यनारायणाची महापूजा आयोजित करण्यात आली असून दुपारी १ वाजता महाप्रसादाचे आयोजन केले आहे.
श्री देव गजानन मंदिर ट्रस्टच्या वतीने सर्व भाविकांना या सोहळ्याचा लाभ घेण्याचे आणि दर्शनासाठी उपस्थित राहण्याचे आवाहन करण्यात आले आहे.
♥ सोबत कार्यक्रमाची रूपरेषा आणि निमंत्रण पत्रिका.
Author: Ratnagiri Vartahar
⭕ मुख्य संपादक - सुजेंद्र सुर्वे , रत्नागिरी वार्ताहर *डिजीटल मिडिया बातमी पत्र* ◀️ Digital Media Creator's ▶️
