लांजा तालुक्यात महायुतीचा झेंडा; १२ पैकी १२ जागांवर दणदणीत विजय
आमदार किरण सामंत यांच्या नेतृत्वाखाली शिवसेना-भाजप महायुतीचे एकहाती वर्चस्व, विरोधकांचा सुफडा साफ
लांजा : जिल्हा परिषद आणि पंचायत समिती निवडणुकीत लांजा तालुक्यात महायुतीने ऐतिहासिक कामगिरी करत एकहाती वर्चस्व प्रस्थापित केले आहे. राजापूर-लांजा विधानसभा मतदारसंघाचे आमदार किरण सामंत यांच्या नेतृत्वाखाली महायुतीने तालुक्यातील सर्वच्या सर्व १२ जागांवर दणदणीत विजय मिळवला आहे.
या निवडणुकीत शिवसेनेने ११ तर भाजपने १ जागा जिंकत महायुतीची ताकद पुन्हा एकदा अधोरेखित केली आहे. जिल्हा परिषदेमधील लांजा तालुक्यातील सर्व ४ जागांवर शिवसेनेच्या उमेदवारांनी विजय संपादन केला. तर पंचायत समितीच्या ८ जागांपैकी ७ जागांवर शिवसेना (शिंदे गट) तर १ जागेवर भाजपच्या उमेदवाराने बाजी मारली आहे.
या निकालामुळे लांजा तालुक्यात विरोधकांना पूर्णपणे नामोहरम करत महायुतीने एकतर्फी विजय मिळवला आहे. मतदारांनी आमदार किरण सामंत यांच्या नेतृत्वावर पुन्हा एकदा विश्वास दाखविल्याचे या निकालातून स्पष्ट झाले आहे.
महायुतीच्या या घवघवीत यशामुळे कार्यकर्त्यांमध्ये उत्साहाचे वातावरण निर्माण झाले असून तालुक्यात ठिकठिकाणी फटाके, ढोल-ताशांच्या गजरात जल्लोष साजरा करण्यात आला.
या विजयामुळे येणाऱ्या काळात स्थानिक स्वराज्य संस्थांमध्ये महायुतीची पकड अधिक मजबूत होणार असल्याचे चित्र स्पष्टपणे दिसत आहे.
—
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
