रत्नागिरीत धाडसी ‘मिडनाईट ऑपरेशन’; एलईडी मासेमारी करणाऱ्या ३ नौकांवर कडक कारवाई
रत्नागिरी (प्रतिनिधी):
राज्याचे मत्स्यव्यवसाय व बंदरे विकास मंत्री नितेश राणे यांनी अवैध मासेमारीविरुद्ध पुकारलेल्या एल्गाराचा परिणाम आता कोकण किनारपट्टीवर दिसू लागला आहे. रत्नागिरीच्या जयगड समुद्रात मत्स्यव्यवसाय विभागाने काल मध्यरात्री एक धाडसी ‘मिडनाईट ऑपरेशन’ राबवून एलईडी लाईटचा वापर करून बेकायदेशीर मासेमारी करणाऱ्या तीन नौकांना रंगेहात पकडले. या कारवाईमुळे अवैध मासेमारी करणाऱ्यांमध्ये मोठी खळबळ उडाली आहे.
मंत्री नितेश राणे यांनी पदभार स्वीकारल्यापासूनच बेकायदेशीर मासेमारीवर कठोर कारवाई करण्याचे निर्देश प्रशासनाला दिले होते. गेल्या काही दिवसांपासून रात्रीच्या अंधारात एलईडीच्या सहाय्याने मासेमारी सुरू असल्याची गुप्त माहिती विभागाला मिळत होती. विशेष म्हणजे, गस्ती नौकेसाठी डिझेल उपलब्ध नसल्याची चर्चा पसरवून मासेमार गाफील राहिले होते; मात्र सहायक आयुक्त सागर कुवेसकर यांच्या मार्गदर्शनाखाली अचानक डिझेलची व्यवस्था करून ही गुप्त मोहीम आखण्यात आली.
समुद्रात थरारक पाठलाग
मध्यरात्रीच्या सुमारास प्रतिकूल हवामान आणि उग्र लाटांची तमा न बाळगता ५ परवाना अधिकारी आणि सुरक्षा पथकाने समुद्रात झेप घेतली. या मोहिमेत चिन्मय जोशी, पार्थ तावडे, स्वप्नील चव्हाण, दीप्ती साळवी, स्मितल कांबळे, तुषार करगुटकर, विनायक शिंदे, सुजन पवार व साईनाथ साळवी यांचा समावेश होता. पथकाने अवैध नौकांना वेढा घातला असता, एका नौकेने पळून जाण्याचा प्रयत्न केला. मात्र, विभागाने समुद्राच्या मध्यभागी तब्बल एक तास या नौकेचा थरारक पाठलाग करून तिला जेरबंद केले.
जप्त करण्यात आलेल्या नौका:
या कारवाईत खालील तीन नौका जप्त करण्यात आल्या आहेत:
१. ‘H. Imtiyaz’ (मालक: इम्तियाज हाजी हसनमिया मुकादम)
२. ‘Lakshmi’ (मालक: लीना लक्ष्मण बिरजे)
३. ‘Aqsa Imran’ (मालक: अब्दुल लतीफ अली होडेकर)
या सर्व नौकांवर महाराष्ट्र सागरी मासेमारी नियमन अधिनियम (MMFRA) अंतर्गत कठोर कारवाईची प्रक्रिया सुरू करण्यात आली आहे. गस्ती नौका आणि ड्रोनच्या साहाय्याने रत्नागिरी जिल्हा सध्या राज्यात अवैध मासेमारीविरोधी कारवाईत आघाडीवर असून, ना. नितेश राणे यांच्या थेट पाठपुराव्यामुळेच ही ‘रेकॉर्डब्रेकिंग’ कारवाई यशस्वी झाल्याचे बोलले जात आहे.
#Ratnagiri #IllegalFishing #NiteshRane #KonkanNews #FisheriesDepartment #MidnightOperation #CoastalSecurity #RatnagiriVartahar #MaharashtraPolitic
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
