महसूल व्यवस्थेत डिजिटल क्रांती! ‘IAW सिंधुदुर्ग’ वेब अॅपचे लोकार्पण
लेखापरीक्षण प्रक्रियेत पारदर्शकता, गती आणि कार्यक्षमतेला मोठी चालना
सिंधुदुर्ग: महाराष्ट्र दिनाचे औचित्य साधत सिंधुदुर्ग जिल्ह्यात महसूल आणि लेखापरीक्षण व्यवस्थेला डिजिटल बळ देणाऱ्या ‘IAW सिंधुदुर्ग’ या आधुनिक वेब अॅप्लिकेशनचे लोकार्पण पालकमंत्री नितेश राणे यांच्या हस्ते करण्यात आले. या अभिनव उपक्रमामुळे अंतर्गत लेखापरीक्षण प्रक्रियेत अधिक पारदर्शकता, गती आणि कार्यक्षमतेत लक्षणीय वाढ होणार आहे.
उद्घाटन सोहळ्यास आमदार निलेश राणे, जिल्हाधिकारी तृप्ती धोडमिसे, जिल्हा परिषद अध्यक्ष प्रमोद कामत, पोलीस अधीक्षक मोहन दहीकर, मुख्य कार्यकारी अधिकारी रवींद्र खेबुडकर, तसेच सिंधुदुर्ग बँक अध्यक्ष मनीष दळवी यांची उपस्थिती होती.
लोकलेखा समितीच्या शिफारशीनुसार १९७७ पासून कार्यरत असलेल्या अंतर्गत लेखा परीक्षण पथकाद्वारे जिल्हाधिकारी कार्यालयाच्या अधीन असलेल्या १४ कार्यालयांचे महसुली जमेचे लेखापरीक्षण केले जाते. आता या नव्या डिजिटल प्रणालीमुळे ही प्रक्रिया अधिक सुलभ आणि प्रभावी होणार आहे.
या वेब अॅप्लिकेशनद्वारे उपविभागीय अधिकारी, भूसंपादन अधिकारी, तहसीलदार तसेच लेखापरीक्षण पथकातील अधिकारी व सहाय्यक अशा एकूण ३६ वापरकर्त्यांना लॉगिन सुविधा देण्यात आली आहे. विशेष म्हणजे, तब्बल ७४० प्रलंबित परिच्छेदांची माहिती ऑनलाईन उपलब्ध करून देण्यात आली असून, १९८६ सालापासूनची जुनी प्रकरणे देखील सहज पाहता येणार आहेत.
प्रलंबित प्रकरणांचा जलद निपटारा, अनुपालन अहवालांचे सुसूत्र सादरीकरण आणि वसुली प्रक्रिया सुलभ करण्यासाठी या अॅपमध्ये अनेक अत्याधुनिक सुविधा देण्यात आल्या आहेत. यामध्ये संभाव्य वार्षिक दौरे, लेखापरीक्षण सूचनापत्र, तपासणी सूची, स्थायी आदेश, मसुदा अहवाल (ड्राफ्ट), अंतिम अहवाल, ऑनलाईन अनुपालन सादर करण्याची सोय यांचा समावेश आहे.
तसेच मासिक, त्रैमासिक, सहामाही आणि वार्षिक प्रगती अहवाल तयार करण्याची सुविधा उपलब्ध असून, पथक सदस्यांच्या दैनंदिनीची नोंद ठेवण्याची सुविधाही या प्रणालीत समाविष्ट करण्यात आली आहे.
या उपक्रमामुळे सिंधुदुर्ग जिल्ह्यातील महसूल व्यवस्थापन अधिक पारदर्शक, गतिमान आणि उत्तरदायी होण्यास मदत होणार असल्याचे प्रशासनाने स्पष्ट केले आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
