जगातील मोस्ट वाँटेड ISIS दहशतवाद्याचा खात्मा; अमेरिका-नायजेरियाची संयुक्त कारवाई
डोनाल्ड ट्रम्प यांची माहिती; अबू बिलाल अल मिनुकी एअर स्ट्राईकमध्ये ठार, आफ्रिकेतील ISIS नेटवर्कला मोठा धक्का
आखाती देशांमधील वाढता तणाव, विविध युद्धजन्य परिस्थिती आणि जागतिक स्तरावर वाढणारा दहशतवाद यामध्ये अमेरिकेनं मोठी दहशतवादविरोधी कारवाई करत ISIS च्या एका कुख्यात दहशतवाद्याचा खात्मा केला आहे. अमेरिकेचे राष्ट्राध्यक्ष Donald Trump यांनी याबाबत माहिती देत ही कारवाई अमेरिका आणि नायजेरियाच्या संयुक्त लष्करी मोहिमेत पार पडल्याचे सांगितले.
ट्रम्प यांच्या माहितीनुसार, ISIS चा दुसऱ्या क्रमांकाचा महत्त्वाचा आणि अत्यंत धोकादायक कमांडर अबू बिलाल अल मिनुकी याला एअर स्ट्राईकमध्ये ठार करण्यात आले. आफ्रिकेतील गुप्त ठिकाणांहून तो दहशतवादी कारवायांचे नियोजन आणि नियंत्रण करत होता. जगभरातील अनेक हिंसक कारवायांमध्ये त्याचा सहभाग असल्याचे सांगितले जात आहे.
ट्रम्प यांनी सोशल मीडिया प्लॅटफॉर्म ‘ट्रुथ’वरून या मोहिमेची माहिती देताना सांगितले की, अल मिनुकीला आफ्रिकेमध्ये आपण सुरक्षित असल्याचा विश्वास होता. मात्र अमेरिकी गुप्तचर यंत्रणांनी त्याचा ठावठिकाणा शोधून काढत अत्यंत नियोजनबद्ध पद्धतीने ही कारवाई यशस्वी केली. या कारवाईमुळे ISIS च्या जागतिक नेटवर्कला मोठा धक्का बसल्याचे मानले जात आहे.
या संपूर्ण मोहिमेसाठी ट्रम्प यांनी नायजेरियाचे सरकार आणि लष्कराचे विशेष आभार मानले. अमेरिका आणि नायजेरियाच्या संयुक्त कारवाईत अत्यंत थरारक पद्धतीने हा ऑपरेशन पूर्ण करण्यात आल्याचेही त्यांनी नमूद केले.
कोण होता अबू बिलाल अल मिनुकी?
अबू बिलाल अल मिनुकी हा ISIS मधील अत्यंत क्रूर आणि प्रभावशाली दहशतवादी कमांडर मानला जात होता. अबू बक्र इब्न मुहम्मद इब्न अली अल-मैनुकी या नावानेही तो ओळखला जात होता. आफ्रिकेतील साहेल प्रदेशात त्याचा मोठा प्रभाव होता.
काउंटर एक्सट्रीमिझम प्रोजेक्टच्या अहवालानुसार, मिनुकीने तब्बल १२ आफ्रिकी देशांमध्ये दहशतीचे जाळे निर्माण केले होते. सेनेगल, मॉरिटानिया, माली, बुर्किना फासो, नायजर, नायजेरिया, चाड आणि सूदान या देशांसह गाम्बिया, गिनी, कॅमरून आणि इरिट्रिया येथेही त्याची सक्रियता होती.
तो ‘इस्लामिक स्टेट वेस्ट आफ्रिका प्रोव्हिन्स’ (ISWAP) या संघटनेसाठी वरिष्ठ कमांडर म्हणून कार्यरत होता. अनेक मोठ्या दहशतवादी हल्ल्यांमध्ये त्याचा थेट सहभाग असल्याची माहिती समोर आली होती. जून २०२३ मध्ये अमेरिकेनं त्याला अधिकृतपणे विशेष जागतिक दहशतवादी (SDGT) घोषित केले होते.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
