आरक्षण उपवर्गीकरणाला विरोध; दिल्लीतील विद्यार्थी आंदोलनाला पाठिंबा, गुहागरमध्ये रिपब्लिकन (आठवले) पक्षाचे निवेदन व निदर्शने

July 25, 2026
1:02 pm
Post Views: 125

: तहसीलदारांना दोन निवेदने सादर; संविधान संरक्षण, आरक्षण उपवर्गीकरण रद्द करण्याची आणि केंद्रीय शिक्षण मंत्र्यांच्या राजीनाम्याची मागणी

आबलोली | संदेश कदम

रिपब्लिकन पार्टी ऑफ इंडिया (आठवले) तालुका गुहागरच्या वतीने अनुसूचित जाती व अनुसूचित जमातींच्या आरक्षणातील उपवर्गीकरणाच्या विरोधात तसेच दिल्लीतील जंतर-मंतर येथे सुरू असलेल्या विद्यार्थी आंदोलनाला पाठिंबा दर्शवत गुहागर येथे निवेदन व निदर्शने करण्यात आली. हा कार्यक्रम शांततेत पार पडला.

पक्षाच्या वतीने महाराष्ट्राचे मुख्यमंत्री यांच्या नावे तहसीलदार कार्यालय, गुहागर येथे तहसीलदार परीक्षित पाटील यांना दोन निवेदने सादर करण्यात आली. निवेदनामध्ये अनुसूचित जातींच्या आरक्षणाचे अ, ब, क, ड अशा उपवर्गांमध्ये विभाजन करण्याच्या निर्णयाला तीव्र विरोध नोंदविण्यात आला. तसेच भारतीय संविधानातील समता, स्वातंत्र्य आणि बंधुता या मूल्यांचे संरक्षण करण्याची मागणी करण्यात आली.

यावेळी दिल्लीतील जंतर-मंतर येथे सुरू असलेल्या विद्यार्थी आंदोलनाला पाठिंबा व्यक्त करण्यात आला. विद्यार्थ्यांवरील कथित पोलिस कारवाईचा निषेध करत केंद्रीय शिक्षण मंत्री धर्मेंद्र प्रधान यांनी नैतिक जबाबदारी स्वीकारून राजीनामा द्यावा, अशी मागणीही करण्यात आली.

निवेदनानंतर गुहागर पोलिस मैदान परिसरात निदर्शने करण्यात आली. “छत्रपती शिवाजी महाराज की जय”, “डॉ. बाबासाहेब आंबेडकरांचा विजय असो”, “घटनात्मक आरक्षणातील उपवर्गीकरण थांबलेच पाहिजे”, “विद्यार्थ्यांवरील अन्याय थांबला पाहिजे” आणि “शिक्षण मंत्र्यांनी राजीनामा द्यावा” अशा घोषणांनी परिसर दणाणून गेला.

यानंतर आयोजित सभेत रिपब्लिकन पार्टी ऑफ इंडिया (आठवले)चे तालुका प्रवक्ते शशिकांत जाधव, ज्येष्ठ मार्गदर्शक एस. एल. सुर्वे, जिल्हा उपाध्यक्ष आप्पा कदम आणि जिल्हा सदस्य मारुती मोहिते यांनी उपस्थितांना मार्गदर्शन केले.

कार्यक्रमाला तालुकाध्यक्ष संदीप कदम, सरचिटणीस सुनील गमरे, चिटणीस दशरथ पवार, रिपब्लिकन पार्टी ऑफ इंडिया (कांबळे)चे ज्येष्ठ कार्यकर्ते अनंत मोहिते, काशिनाथ सुर्वे, माजी तालुकाध्यक्ष महेंद्र कदम, तालुका उपाध्यक्ष सुरेश जाधव, विलास गमरे, चंद्रकांत मोहिते, भीमसेन सावंत, शंकर मोहिते, अनिल जाधव, संतोष मोहिते, युवा कार्यकर्ते मयूर गमरे तसेच महिला-पुरुष भीमसैनिक मोठ्या संख्येने उपस्थित होते.

कार्यक्रम शांततेत आणि शिस्तबद्ध वातावरणात पार पडल्याची माहिती आयोजकांनी दिली.

SEO Keywords: गुहागर बातमी, रिपब्लिकन पार्टी ऑफ इंडिया आठवले, आरक्षण उपवर्गीकरण, गुहागर निदर्शने, दिल्ली विद्यार्थी आंदोलन, धर्मेंद्र प्रधान, संविधान बचाव, रत्नागिरी बातम्या, गुहागर तहसील कार्यालय, RPI Athawale Guhagar.