मालगुंडच्या श्री दुबळेश्वर महादेव मंदिरात १७ ऑगस्टला रुद्राभिषेक सोहळा
श्रावण शुद्ध पंचमीनिमित्त सकाळी ६ वाजता धार्मिक कार्यक्रम; भाविकांनी उपस्थित राहण्याचे आवाहन
मालगुंड, रत्नागिरी : पवित्र श्रावण मासानिमित्त तीर्थक्षेत्र मालगुंड येथील स्वयंभू श्री दुबळेश्वर महादेव मंदिर देवस्थानात सोमवार, दि. १७ ऑगस्ट २०२६ रोजी श्रावण शुद्ध पंचमीच्या निमित्ताने रुद्राभिषेक सोहळ्याचे आयोजन करण्यात आले आहे. सकाळी ६ वाजता या धार्मिक कार्यक्रमाला सुरुवात होणार आहे.
श्रावण महिन्यात भगवान शिवाच्या उपासनेला विशेष महत्त्व असल्याने श्री दुबळेश्वर महादेव मंदिरात आयोजित या रुद्राभिषेक सोहळ्यास भाविकांनी मोठ्या संख्येने उपस्थित राहावे, असे आवाहन देवस्थानच्या वतीने करण्यात आले आहे.
या सोहळ्यात आचमन, प्राणायाम, भद्रसूक्त पठण, प्रधान संकल्प, भूमी-आसन-हस्त कलश-सूर्य-दीप आदी पूजन, शंखध्वनी, गणेश पूजन, पंडक न्यास, शिवध्यान, शिव षोडशोपचार पूजन, रुद्राभिषेक, धूप-दीप-नैवेद्य आणि महाआरती असे विविध धार्मिक विधी पार पडणार आहेत.
रुद्राभिषेकाचा धार्मिक विधी वेदमूर्ती श्री. प्रथमेश पाठक गुरुजी यांच्या मंगलमय मंत्रोच्चारात संपन्न होणार आहे. या निमित्ताने मंदिर परिसरात भक्तिमय वातावरण निर्माण होणार असून, ‘ॐ नमः शिवाय’ आणि ‘हर हर महादेव’च्या जयघोषात शिवभक्तांना रुद्राभिषेक व श्री दुबळेश्वर महादेवाच्या दर्शनाचा लाभ घेता येणार आहे.
कार्यक्रमाची माहिती
ठिकाण : श्री दुबळेश्वर महादेव मंदिर, श्रीक्षेत्र दुबळेश्वर, मालगुंड, रत्नागिरी
दिनांक : सोमवार, १७ ऑगस्ट २०२६
निमित्त : श्रावण शुद्ध पंचमी
वेळ : सकाळी ६ वाजता
मुख्य कार्यक्रम : रुद्राभिषेक व महाआरती
सर्व भाविक भक्तांनी या पवित्र रुद्राभिषेक धर्मकार्याचा आणि श्री दुबळेश्वर महादेव लिंगाच्या दर्शनाचा लाभ घ्यावा, असे नम्र आवाहन स्वयंभू श्री दुबळेश्वर महादेव मंदिर देवस्थान यांच्या वतीने करण्यात आले आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
