लांजा तालुक्यात रानडुकरांचा उपद्रव; साटवलीतील शेतकऱ्याची भातशेती उद्ध्वस्त
: साटवली गांगोवाडीतील लक्ष्मण सोनू तरळ यांचे भातपीक रानडुकरांनी केले जमीनदोस्त; वनविभागाने पंचनामा करून नुकसानभरपाई देण्याची ग्रामस्थांची मागणी
लांजा (प्रतिनिधी : जितेंद्र चव्हाण) : लांजा तालुक्यात यंदा अपुऱ्या पावसामुळे आधीच शेतकरी अडचणीत असताना आता रानडुकरांच्या उपद्रवामुळे शेतीचे नुकसान होत आहे. साटवली गांगोवाडी येथील शेतकरी लक्ष्मण सोनू तरळ यांच्या शेतातील तयार झालेली भातशेती रानडुकरांच्या कळपाने तुडवून पूर्णपणे उद्ध्वस्त केली आहे. ऐन कापणीच्या तोंडावर भातपीक नष्ट झाल्याने शेतकऱ्याचे मोठे नुकसान झाले असून, वनविभागाने तातडीने पंचनामा करून नुकसानभरपाई द्यावी, अशी मागणी ग्रामस्थ आणि शेतकऱ्यांकडून होत आहे.
अपुऱ्या पावसामुळे आधीच शेतकरी संकटात
यंदाच्या पावसाळ्यात अपेक्षित पाऊस न झाल्याने लांजा तालुक्यातील अनेक भागांत पाणीटंचाईची परिस्थिती निर्माण झाली होती. अशा प्रतिकूल परिस्थितीतही शेतकऱ्यांनी उपलब्ध पाण्याचा वापर करून मोठ्या कष्टाने भातशेती फुलवली होती. मात्र, पावसाअभावी निर्माण झालेल्या अडचणी आणि भातपिकावर झालेला ‘चिंब’चा प्रादुर्भाव यामुळे पिकाचे आधीच काही प्रमाणात नुकसान झाले होते.
तरीही शेतातून थोडाफार भात हाती येईल, या आशेवर शेतकरी होता. मात्र, भातपीक कापणीसाठी तयार झाले असतानाच रानडुकरांच्या कळपाने रात्रीच्या वेळी शेतात घुसून पिकाची नासधूस केली. भाताची रोपे तुडवून टाकल्याने तयार झालेले पीक पूर्णपणे जमीनदोस्त झाले. त्यामुळे वर्षभराच्या मेहनतीवर पाणी फिरल्याने लक्ष्मण तरळ यांच्यासमोर आर्थिक संकट उभे राहिले आहे.
वनविभागाने तातडीने पंचनामा करावा
साटवली गांगोवाडी येथील या घटनेमुळे परिसरातील शेतकऱ्यांमध्ये चिंता व्यक्त होत आहे. आधीच पाणीटंचाई आणि पिकावरील रोगराईमुळे नुकसान सहन करावे लागत असताना आता वन्यप्राण्यांच्या उपद्रवामुळे शेतकऱ्यांच्या अडचणी वाढल्या आहेत.
वनविभागाच्या अधिकाऱ्यांनी तातडीने घटनास्थळी भेट देऊन नुकसानीची प्रत्यक्ष पाहणी करावी. बाधित शेतीचा पंचनामा करून शेतकरी लक्ष्मण सोनू तरळ यांना नियमानुसार आर्थिक नुकसानभरपाई मिळवून द्यावी, अशी मागणी ग्रामस्थ व शेतकऱ्यांकडून करण्यात येत आहे.
शेतकऱ्यांना शासनाच्या मदतीची अपेक्षा
लांजा तालुक्यातील शेतकऱ्यांना यंदा अपुरा पाऊस, पिकावरील रोगांचा प्रादुर्भाव आणि वन्यप्राण्यांचा उपद्रव अशा विविध संकटांचा सामना करावा लागत आहे. अशा परिस्थितीत शेतीचे नुकसान झालेल्या शेतकऱ्यांना तातडीने मदत मिळणे आवश्यक आहे. त्यामुळे वनविभाग आणि संबंधित प्रशासन या घटनेची दखल घेऊन बाधित शेतकऱ्याला दिलासा देणार का, याकडे ग्रामस्थांचे लक्ष लागले आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
