दापोलीत माजी सैनिकाच्या कुटुंबाला घरात घुसून मारहाण; ६ जणांवर गुन्हा दाखल
तालुक्यातील करजगाव चिपळुणकरवाडी येथे एक धक्कादायक घटना.
दापोली, २२ जून २०२५: दापोली तालुक्यातील करजगाव चिपळुणकरवाडी येथे एक धक्कादायक घटना समोर आली आहे. शनिवारी सकाळी एका सेवानिवृत्त ऑर्डिनरी कॅप्टनच्या कुटुंबाला घरात घुसून मारहाण करण्यात आली आहे. याप्रकरणी माजी सैनिक सुदेश केशव चिपळुणकर (वय ५७) यांच्या तक्रारीवरून प्रसाद चंद्रकांत धयाळकर आणि पाच महिलांविरोधात दापोली पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, सुमारे वर्षभरापूर्वी सुदेश चिपळुणकर यांनी आरोपी प्रसाद धयाळकर याच्या विहिरीच्या बांधकामात सुरुंग लावण्याला विरोध केला होता. याच जुन्या रागातून शनिवारी सकाळी ६:४५ वाजण्याच्या सुमारास प्रसाद धयाळकर आणि त्याच्यासोबतच्या तीन महिलांनी सुदेश चिपळुणकर यांच्या करजगावातील राहत्या घरात जबरदस्तीने प्रवेश केला. त्यांनी सुदेश चिपळुणकर, त्यांच्या आई आणि पत्नीला शिवीगाळ करत हाताने मारहाण केली. एवढेच नाही, तर त्यांना जीवे मारण्याची धमकीही दिल्याचे फिर्यादीत नमूद करण्यात आले आहे.
या घटनेनंतर सुदेश चिपळुणकर यांनी तात्काळ दापोली पोलीस ठाण्यात धाव घेत तक्रार नोंदवली. पोलिसांनी गुन्हा दाखल करून तपास सुरू केला आहे. आरोपी प्रसाद चंद्रकांत धयाळकर हा मूळचा करजगाव चिपळुणकरवाडी येथील रहिवासी असून, सध्या तो मुंबईत वास्तव्यास असल्याची माहिती पोलिसांनी दिली. या प्रकरणाचा अधिक तपास दापोली पोलीस करत आहेत.
Author: Prachi Sutar
Prachi Sutar - Ratnagiri. *Digital media creators* Office clark.PR.
