💥💥 ब्रेकींग बातमी
🟣 पुण्यात गणपती विसर्जनाला गालबोट; चार जण पाण्यात बुडाले; दोघांचा मृत्यू, दोघांचा शोध सुरू!
पुणे : राज्यभरात गणेश विसर्जनाचा जल्लोष सुरू असतानाच पुण्यात भीषण घटना घडली आहे. वाकी बुद्रुक, शेलपिंपळगाव (ता. खेड) येथील भामा नदीत आणि बिरदवडी (ता. खेड) येथील विहिरीत गणपती विसर्जनादरम्यान चार युवक पाण्यात बुडाले. यापैकी दोन जणांचा मृत्यू झाला असून दोन जणांचा शोध सुरू आहे.
वाकी बुद्रुक येथील प्रियदर्शन शाळेजवळील भामा नदीत अभिषेक संजय भाकरे (वय २१, रा. कोयाळी, ता. खेड) आणि आनंद जयस्वाल (वय २८, रा. उत्तरप्रदेश) हे विसर्जनादरम्यान पाण्यात बुडाले. यात आनंद जयस्वाल याचा मृतदेह सापडला असून अभिषेक भाकरे याचा चाकण पोलीस, एनडीआरएफ, अग्निशमन दल आणि रेस्क्यू टीमकडून शोध सुरू आहे.
दरम्यान, शेलपिंपळगाव येथील भामा नदीत गणेश विसर्जन करताना रवींद्र वासुदेव चौधरी (वय ४५, रा. शेलपिंपळगाव) हे वाहून गेले, अशी माहिती पोलिसांनी दिली आहे. तसेच बिरदवडी (ता. खेड) येथील संदेश पोपट निकम (वय ३५) यांचा विसर्जनावेळी तोल गेल्यामुळे पाण्यात बुडून मृत्यू झाला आहे. त्यांचा मृतदेह रेस्क्यू टीमच्या मदतीने बाहेर काढून पुढील कार्यवाहीसाठी चाकण ग्रामीण रुग्णालयात दाखल करण्यात आला आहे.
या दुःखद घटनांनी चाकण परिसरात हळहळ व्यक्त होत आहे. विसर्जनासाठी मोठ्या प्रमाणावर गर्दी होत असल्याने विहिरी, तलाव, नद्यांमध्ये सुरक्षिततेची काळजी घेणे अत्यावश्यक असल्याचे प्रशासनाकडून आवाहन करण्यात आले आहे.
#पुणे #गणेशविसर्जन #बुडूनमृत्यू #चाकण #NDRF #Ganpati2025
📸 फोटो
Author: RV. Reporters
Guhagar Office .. * Ratnagiri vartahar Digital News * ..
