कुणबी समाजाचे नियोजनबद्ध आंदोलन, रणनिती ठरली, ७ ऑक्टोबर रोजी आझाद मैदान येथे मोर्चा काढत आंदोलनाला सुरुवात
मुंबई – संदीप शेमणकर
बुधवार दि.१० सप्टेंबर रोजी परेल येथील संघ कार्यालयात झालेल्या बैठकीत दि. ७ ऑक्टोबर २०२५ रोजी आझाद मैदान येथे कुणबी समाजाचा मोर्चा काढून आंदोलनाला सुरुवात करण्यात येणार आहे असा एकमुखी ठराव बैठकीत करण्यात आला.
यावेळी संघाध्यक्ष अनिलजी नवगणे यांनी आपल्या कार्यकारिणी सहित तालुक्यातील शाखांचे पदाधिकारी, संघ प्रतिनिधी, समाजाच्या इतर संघटना यांना नियोजन सभेला पाचारण केले होते. अतिशय नियोजनबद्ध पद्धतीने आंदोलन करण्यात येणार असून त्याची रणनीती ठरविण्यात आली.
संघाच्या वतीने समाजातील वकिलांना एकत्र घेऊन लवकरच मुंबई उच्च न्यायालयात शासनाने काढलेल्या जीआर विरोधात पिटीशन दाखल करुन दाद मागण्यात येणार आहे. तसेच शाखांतर्फे ग्रामीण व मुंबईत घरोघरी जाऊन आरक्षण बचाव करता व आंदोलनात सहभागी होण्यासाठी जनजागृती करण्याकरिता आंदोलन समिती स्थापन करण्यात आली.
संघाध्यक्ष अनिल नवघणे यांच्या नेतृत्वाखाली करण्यात येणाऱ्या आंदोलनात ओबीसी संघटनांच्या इतर समाज घटकांना देखील बरोबर घेऊन मोठ्या प्रमाणात आंदोलन करण्याचे ठरविण्यात आले. यावेळी उपस्थित संघाचे माजी अध्यक्ष ओबीसी जनमोर्चाचे कार्याध्यक्ष श्री. चंद्रकांतजी बावकर त्याचप्रमाणे संघाचे उपाध्यक्ष श्री. म्हसकर, उदय कटे, अवधूत तोरस्कर, सरचिटणीस कृष्णा वने, खजिनदार महेश शिर्के, राजकीय संघटन समितीचे अशोक वालम, नवी मुंबईचे मा. उपमहापौर अविनाश लाड, माजी सरचिटणीस मधुकर तोरस्कर, अरविंद डाफळे, पांडुरंगजी उपळकर, रविंद्र मटकर, अनिलजी भोवड, माधव कांबळे, प्रमोद खेराडे,ऍड सुभाष बाणे, ऍड महेंद्र मांवकर, ऍड मंगेश हुमणे व इतर अनेक समाज बांधव मोठया संख्येने उपस्थित होते.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
