💥 ईव्हीएमवर उमेदवारांचा रंगीत फोटो; निवडणूक आयोगाचा ऐतिहासिक निर्णय
बिहार निवडणुकीपासून बदलांची अंमलबजावणी, मतदारांचा गोंधळ होणार संपुष्टात
नवीदिल्ली : भारतीय निवडणूक आयोगाने ऐतिहासिक निर्णय घेतला असून यापुढे मतदान यंत्रावर (EVM) उमेदवाराचे नाव, निवडणूक चिन्ह यासोबतच रंगीत फोटोही दिसणार आहे. येत्या बिहार विधानसभा निवडणुकीपासून या नव्या पद्धतीचा श्रीगणेशा होणार आहे.
दिवाळीनंतर होणाऱ्या बिहार निवडणुकीकडे देशाचे लक्ष लागले आहे. या पार्श्वभूमीवर मतदार याद्यांच्या फेरतपासणीवरून विरोधकांनी आक्षेप घेतले असतानाच आयोगाने मतदारांना डोळ्यासमोर ठेवून हा महत्त्वाचा निर्णय घेतला आहे.
अनेकदा नावसाधर्म्यामुळे मतदारांमध्ये गोंधळ उडतो. तो गोंधळ टाळण्यासाठी तसेच मतदारांचा संभ्रम दूर करण्यासाठी उमेदवारांचा ठळक व स्पष्ट रंगीत फोटो छापण्याचे निर्देश आयोगाने दिले आहेत. उमेदवारांची नावेही एकाच फॉन्टमध्ये असतील, जेणेकरून मतदारांना वाचनात अडचण येणार नाही.
याशिवाय उमेदवारांचे सिरियल नंबर आणि “NOTA” चा पर्याय अधिक ठळकपणे दाखवण्याचाही निर्णय आयोगाने घेतला आहे. बिहारमधील या प्रयोगानंतर महाराष्ट्रासह देशभरातील निवडणुकांमध्ये हीच पद्धत लागू होणार आहे. दरम्यान, बिहारप्रमाणेच महाराष्ट्रातही आगामी महापालिका व स्थानिक स्वराज्य संस्थांच्या निवडणुकांपूर्वी मतदार याद्यांची फेरतपासणी होण्याची शक्यता आहे.
—
📌 हॅशटॅग्स
#EVM #ElectionCommission #BiharElection2025 #IndianPolitics #BreakingNews #MaharashtraElection #VotingRights
—
📷
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
