💥 Sanjay Raut Meets Devendra Fadnavis — ठाकरे गटाचे खासदार संजय राऊत आणि उपमुख्यमंत्री देवेंद्र फडणवीस आमने-सामने; १५ मिनिटांची चर्चा, राजकीय रसिकतेला उधाण!
मुंबई : राज्याचे उपमुख्यमंत्री देवेंद्र फडणवीस आणि ठाकरे गटाचे खासदार संजय राऊत यांची झालेली अनपेक्षित भेट सध्या राजकीय वर्तुळात चर्चेचा विषय ठरली आहे. राऊत यांचे व्याही राजेश नार्वेकर यांच्या मुलाच्या विवाहसोहळ्यात दोन्ही नेते समोरासमोर आले आणि तब्बल १५ मिनिटे हसतखेळत चर्चा केल्याची माहिती समोर आली आहे.
राऊत यांच्या प्रकृतीची फडणवीसांकडून विचारपूस
संजय राऊत यांना काही दिवसांपूर्वी गंभीर आजाराचे निदान झाले होते आणि डॉक्टरांनी त्यांना सक्तीची विश्रांती घेण्याचा सल्ला दिला होता. त्यामुळे त्यांनी काही काळ सार्वजनिक जीवनापासून दूर राहण्याचा निर्णय घेतला होता. मात्र प्रकृती सुधारल्याने त्यांनी अलिकडे काही कार्यक्रमांना उपस्थिती लावली आहे.
विवाहसोहळ्यात देवेंद्र फडणवीस यांनी खासदार राऊत यांच्या प्रकृतीची विचारपूस केली. दोन्ही नेते काही वेळ निवांतपणे चर्चा करतानाचे फोटो आता सोशल मीडियावर व्हायरल झाले आहेत.
उद्धव ठाकरे आणि राज ठाकरे देखील भेटणार?
काही दिवसांपूर्वी उद्धव ठाकरे यांनी भांडूप येथील राऊत यांच्या घरी जाऊन त्यांची भेट घेतली होती आणि प्रकृतीत सुधारणा होत असल्याची माहिती दिली होती.
आज मनसेप्रमुख राज ठाकरे देखील संजय राऊत यांची भेट घेणार असल्याचे समजते.
उद्धव-फडणवीस समोरासमोर आले का?
विवाहसोहळ्यात उद्धव ठाकरे देखील उपस्थित होते. मात्र उद्धव ठाकरे आणि देवेंद्र फडणवीस यांची भेट झाली की नाही, याबाबत कोणतीही अधिकृत माहिती उपलब्ध नाही.
राजकीय वर्तुळात चर्चांना उधाण
संजय राऊत आणि देवेंद्र फडणवीस यांच्या या अनपेक्षित भेटीमुळे आगामी राज्य राजकारणात नव्या समीकरणांची चर्चा सुरू झाली आहे. दोन्ही नेत्यांमधील संवादाची राजकीय पार्श्वभूमी शोधण्याचा प्रयत्न राजकीय निरीक्षक करत आहेत.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
