मातोश्रीवर शिवसेना (उद्धव बाळासाहेब ठाकरे) खासदारांची बैठक; आगामी रणनीतीवर सविस्तर चर्चा
उद्धव ठाकरे यांच्या उपस्थितीत पक्ष बळकटी, संघटनात्मक बदल आणि राजकीय दिशा यावर मंथन
मुंबई दि.२२ मार्च (प्रतिनिधी):
मुंबईत मातोश्री येथे शिवसेना (उद्धव बाळासाहेब ठाकरे) पक्षाच्या खासदारांची महत्त्वपूर्ण बैठक आज पक्षप्रमुख उद्धव ठाकरे यांच्या उपस्थितीत पार पडली. या बैठकीत आगामी राजकीय रणनीती, संघटनात्मक मजबुतीकरण आणि विविध चालू घडामोडींवर सविस्तर चर्चा करण्यात आली.
या बैठकीला युवासेनाप्रमुख तसेच आमदार आदित्य ठाकरे यांच्यासह शिवसेना नेते खासदार अरविंद सावंत, सचिव खासदार अनिल देसाई, उपनेत्या खासदार प्रियंका चतुर्वेदी, तसेच खासदार ओमराजे निंबाळकर, नागेश पाटील-आष्टीकर, संजय दिना पाटील, राजाभाऊ वाजे, संजय देशमुख आणि भाऊसाहेब वाकचौरे उपस्थित होते.
बैठकीत पक्षाची संघटनात्मक ताकद वाढविणे, आगामी निवडणुकांच्या पार्श्वभूमीवर मतदारांशी संपर्क वाढविणे, तसेच विविध राजकीय मुद्द्यांवर पक्षाची भूमिका अधिक प्रभावीपणे मांडण्याबाबत मार्गदर्शन करण्यात आले. पक्षप्रमुख उद्धव ठाकरे यांनी सर्व खासदारांना एकजुटीने काम करण्याचे आवाहन केले.
यावेळी राज्यातील सध्याच्या राजकीय परिस्थितीवरही चर्चा झाली असून, जनतेच्या प्रश्नांवर आक्रमक भूमिका घेण्याचा निर्धार व्यक्त करण्यात आला. आगामी काळात पक्षाची भूमिका अधिक ठोसपणे मांडत संघटन अधिक बळकट करण्यावर भर देण्यात येणार असल्याचे संकेत या बैठकीतून मिळाले.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
