कालुस्ते बु. गावातील दुग्ध व्यवसायिक शेतकऱ्यांनी घेतले गांडूळ खत निर्मिती प्रशिक्षण…
तळवली (मंगेश जाधव)……
दुग्ध व्यवसाय करणाऱ्या शेतकऱ्यांनी फक्त दुधाचे उत्पन्न डोळ्यासमोर न ठेवता शेणाचा उपयोग करून गांडूळ खत निर्मितीकडे देखील उत्पन्नाचे साधन बघितले पाहिजे हा उद्देश समोर ठेवून TWJ फाऊंडेशन आणि फॅन्ड्री फाऊंडेशन यांच्या संयुक्त विद्यमाने दिनांक 15 डिसेंबर 2024 या दिवशी कालुस्ते बु. गावात गांडूळ खत निर्मिती प्रशिक्षण आयोजित करण्यात आले होते.
निलेश कमलाकर कदम या दुग्ध व्यवसायिक शेतकऱ्यांच्या वाड्याजवळ प्रात्यक्षिक दाखवून शेतकऱ्यांना प्रशिक्षण देण्यात आले. प्लॅस्टिक बेड चा उपयोग करून गांडूळ खत निर्मिती करता येते याची प्रथम माहिती देऊन हा बेड कसा उभा करायचा याचे प्रात्यक्षिक दाखविण्यात आले. खत निर्मिती होण्यासाठी आवश्यक असलेले शेण, पाला पाचोळा, नारळाची सोडणे, सुखे गवत या गोष्टी कच्चा माल म्हणून उपलब्ध असणे आवश्यक आहे याची माहिती देण्यात आली. हा कच्चा माल उभा केलेल्या बेड मध्ये क्रमवारी कशा पद्धतीने भरून घ्यायचा याचे प्रात्यक्षिक करून दाखविण्यात आले. आवश्यक साहित्याने बेड पूर्ण भरून झाल्यावर शेवटी खत निर्मिती करणारे गांडूळ बेड मध्ये सोडण्यात आले. सुरुवातीला आणि नंतर किती प्रमाणात पाणी मारण्याची आवश्यकता आहे याची देखील माहिती देण्यात आली.
या प्रशिक्षणात गांडूळ खताचे मार्केट कसे आहे, आपण स्वतः ते कसे उभे करायचे या विषयी शेतकऱ्यांनी विचारलेल्या प्रश्नांवर मार्गदर्शन करण्यात आले. जवळपास 22 शेतकऱ्यांनी या प्रशिक्षणाचा लाभ घेतला. फॅन्ड्री फाऊंडेशन संस्थेने दुग्ध व्यवसायिक शेतकऱ्यांनी गांडूळ खत निर्मिती करून आपल्या अर्थार्जनात वाढ करावी यासाठी सुरुवातीला शेतकऱ्यांना बेड उपलब्ध करून दिले. ग्रामीण अर्थव्यवस्था ही निसर्गावर आधारीत असून भारतीय अर्थव्यवस्थेचा कणा आहे. ही अर्थव्यवस्था टिकून रहाण्यासाठी शेती आणि शेती पूरक व्यवसाय शिवाय पर्याय नाही. TWJ फाउंडेशन संस्था ग्रामविकास अंतर्गत शाश्वत अर्थव्यवस्था उभी करण्यासाठी अशा प्रकारचे शेती पूरक व्यवसाय प्रशिक्षण घेऊन शेतकऱ्यांना हातभार लावण्याचा प्रयत्न करत आहे.
Author: Ratnagiri Vartahar
⭕ मुख्य संपादक - सुजेंद्र सुर्वे , रत्नागिरी वार्ताहर *डिजीटल मिडिया बातमी पत्र* ◀️ Digital Media Creator's ▶️
