तरुण आंबा व्यावसायिकाचा अपघाती मृत्यू; नवविवाहितेचा हंबरडा
नाखरे-खांबडवाडी येथे दुचाकी आणि कारच्या धडकेत दुर्दैवी घटना
रत्नागिरी – जिल्ह्यात अपघातांचे सत्र थांबताना दिसत नाही. बुधवारी (ता. २६) दुपारी अडीचच्या सुमारास नाखरे-खांबडवाडी येथे झालेल्या भीषण अपघातात तरुण आंबा व्यावसायिक चंद्रवदन शैलेंद्र शिंदे दसुरकर (वय २९, रा. उंबरवाडी, नाखरे) याचा जागीच मृत्यू झाला. या घटनेमुळे संपूर्ण परिसरात हळहळ व्यक्त केली जात आहे. विशेष म्हणजे महिनाभरापूर्वीच त्याचे लग्न झाले होते, त्यामुळे नवविवाहित पत्नीच्या आक्रोशाने हृदय पिळवटून निघत होते.
अपघाताची घटना
मिळालेल्या माहितीनुसार, चंद्रवदन हा दुचाकी (एमएच ०८ बीजी २९१६) वरून पावसहून नाखरे येथील आपल्या घरी जात असताना, खांबडवाडी परिसरात त्याची समोरून येणाऱ्या कारशी (एमएच ४७ एबी २१९४) जोरदार धडक झाली. कारचालक अनिकेत अविनाश खाके (वय २८) यांच्या वाहनाशी झालेल्या या धडकेत चंद्रवदन गंभीर जखमी झाला आणि जागीच त्याचा मृत्यू झाला. अपघाताचे नेमके कारण शोधण्यासाठी पोलिसांनी तपास सुरू केला आहे.
संपूर्ण गावात शोककळा
चंद्रवदन हा सुस्वभावी, हसतमुख आणि कष्टाळू व्यक्तिमत्त्वाचा होता. त्याला ट्रेकिंगची विशेष आवड होती आणि तो यशस्वी आंबा बागायतदार म्हणून ओळखला जात होता. त्याने वकिलीचे शिक्षणही पूर्ण केले होते. काही महिन्यांपूर्वीच विवाहबंधनात अडकलेल्या या तरुणाच्या अकाली जाण्याने कुटुंबावर दुःखाचा डोंगर कोसळला आहे.
वाहतूक सुरक्षेचा प्रश्न ऐरणीवर
या अपघातामुळे पावस-नाखरे रस्त्यावरील वाहतुकीच्या सुरक्षेचा मुद्दा पुन्हा ऐरणीवर आला आहे. या मार्गावर वारंवार अपघात होत असल्याने स्थानिकांनी प्रशासनाने तातडीने उपाययोजना करण्याची मागणी केली आहे.
या दुर्दैवी घटनेमुळे संपूर्ण गावात शोककळा पसरली असून, चंद्रवदनच्या अचानक जाण्याने मित्रपरिवार आणि कुटुंबीयांमध्ये हळहळ व्यक्त केली जात आहे.
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
