बांधकाम विभागाची कारवाई; ठेकेदार नोंदणी रद्द, पण प्रश्न कायम!
रत्नागिरी :- निलेश रहाटे
वाटद मिरवणे ग्रा. पं मधील गेली 3 वर्ष 9 महिन्यांपासून शौचालय गैरव्यवहार प्रकरणाची चौकशी सुरू असूनही आजपर्यंत वरिष्ठ कार्यालयासह जिल्हा परिषद सीईओ कार्यालयाकडून कोणत्या ही दोषी लोकसेवक वर ठोस कारवाई करण्यात आलेली नाही. तसेच या प्रकरणात नेमके किती लोकसेवक दोषी आहेत, हेही अद्याप प्रशासन स्पष्ट करत नाही.
अशा परिस्थितीत तत्कालीन सरपंच अनिकेत सुर्वे यांना जिल्हा परिषद रत्नागिरीच्या बांधकाम विभागाने ठेकेदार नोंदणी प्रमाणपत्र दिले कसे, हा गंभीर प्रश्न RTI कार्यकर्ता व पत्रकार निलेश रहाटे यांनी उपस्थित केला होता.
या संदर्भात निलेश रहाटे यांनी बांधकाम विभागाकडे लेखी आक्षेप नोंदवून, शौचालय गैरव्यवहार प्रकरणाचा अंतिम निर्णय होईपर्यंत ठेकेदार नोंदणी तात्पुरते स्थगित किंवा रद्द करण्यात यावे अशी मागणी केली होती.
या मुद्द्यावर आवाज उठल्यानंतर संबंधित ठेकेदार अनिकेत सुर्वे यांनी स्वतःच्या इच्छेने ठेकेदार नोंदणी प्रमाणपत्र रद्द करण्यासाठी बांधकाम विभागाला लेखी विनंती केल्याचे समजते. त्या विनंतीवर कार्यवाही करत जिल्हा परिषद रत्नागिरीच्या बांधकाम विभागाने त्यांची ठेकेदार नोंदणी रद्द केली असल्याचे उपलब्ध कागदपत्रांतून स्पष्ट झाले आहे.
सदर स्वच्छ भारत मिशन (ग्रामीण) अंतर्गत शौचालय गैरव्यवहार प्रकरणाबाबत सन 2022 पासून विविध तक्रारी दाखल असून चौकशी प्रक्रिया अद्याप सुरू आहे. चौकशी प्रलंबित असताना संबंधित व्यक्तीस ठेकेदार म्हणून पात्रता देण्याचा निर्णय कोणत्या निकषांवर घेण्यात आला, हा प्रश्न यापूर्वीही उपस्थित करण्यात आला होता.
ठेकेदार नोंदणी रद्द करण्यात आली असली तरी रद्दीकरण आदेशाची माहिती सर्व संबंधित विभागांना देण्यात आली आहे का, हा महत्त्वाचा प्रश्न निर्माण झाला आहे. जिल्हा परिषद अंतर्गत विविध विभाग, पंचायत समिती तसेच ई-टेंडर प्रणालीमध्ये ही नोंद अद्ययावत करण्यात आली आहे का, याबाबत अद्याप स्पष्टता समोर आलेली नाही.
रद्दीकरण आदेशाची माहिती वेळेत सर्व विभागांना न कळवल्यास किंवा नोंदी अद्ययावत करण्यात विलंब झाल्यास शासकीय कामांमध्ये अडथळे निर्माण होण्याची शक्यता नाकारता येत नाही.
यासंदर्भात रद्दीकरण आदेशाची माहिती सर्व संबंधित कार्यालयांना तात्काळ कळवून ई-प्रणालीमध्ये आवश्यक बदल करण्यात यावेत, अशी मागणी जिल्हा परिषद बांधकाम विभागाच्या कार्यकारी अभियंता बिराजे मॅडम यांच्याकडे करण्यात आली आहे.
दरम्यान, ठेकेदार नोंदणी रद्द झाली असली तरी मूळ शौचालय गैरव्यवहार प्रकरणातील चौकशी अद्याप प्रलंबित आहे. त्यामुळे या प्रकरणात जबाबदारी निश्चित करून संबंधित विभाग या तक्रारीकडे गांभीर्याने लक्ष देऊन पुढील कार्यवाही करणार की पुन्हा या प्रकरणाचा पाठपुरावा करावा लागणार.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
